«Առաջին լրատվական»-ի տեղեկություններով՝ առաջիկայում նոր ձևավորվելիք կառավարության կազմում սպասվում են էական փոփոխություններ:
Ըստ մեր տեղեկությունների՝ ՀՀ Պաշտպանության նոր նախարար է նշանակվելու ԼՂՀ նախկին նախագահ Արկադի Ղուկասյանը:
Վերջին շրջանում ՊՆ բարձրագույն զինվորականության շրջանում չափազանց մեծացել է դժգոհությունը Պաշտպանության նախարարից: Իրավիճակը սրվել է հատկապես Գևորգ Կոստանյանի Զինվորական դատախազի պաշտոնում նշանակվելուց հետո համակարգի գրեթե բոլոր ուղղություններով սկսված ինտենսիվ ստուգումների պատճառով: Զինվորական դատախազության համակարգային ստուգումների արդյունքում պաշտպանության համակարգի բարձրաստիճան զինվորականները մնացել են գրեթե անպաշտպան:
Վերջին ամենացայտուն օրինակը գեներալ Արշալույս Փայտյանի օրինակն է, երբ վերջինս նեղ շրջապատում Պաշտպանության նախարարի պատիվը պահելու պատճառով վերջնահաշվում դարձավ համակարգի ներսում առկա լարված ու անառողջ հարաբերությունների զոհը:
Ի դեպ «Առաջին լրատվական»-ի տեղեկություններով Ս.Օհանյանն էլ կնշանակվի Տարածքային կառավարման նախարար: Իսկ թե ինչ է լինելու ՏԿ գործող նախարար Արմեն Գևորգյանի հետ դեռ չհաջողվեց պարզել:
Լուսանկարը՝ PanARMENIAN Photo-ի
