Վրաստանի պատվիրակությունը կիրակի առավոտյան ուղևորվել է Մոսկվա՝ բանակցելու ռուսական շուկա վրացական գինիների և հանքային ջրերի մատակարարումները վերսկսելու վերաբերյալ: Այս մասին RIA Novosti-ին հայտնել են Վրաստանի գյուղատնտեսության նախարարության մամլո ծառայությունից:
Վրացական գինիների և հանքային ջրերի ներկրումը արգելվել էր Սպառողների իրավունքների պաշտպանության դաշնային ծառայության կողմից 2006 թվականի գարնանը՝ ռուս-վրացական հարաբերությունների սրումից հետո: Ռուսաստանի գլխավոր սանիտարական բժիշկ Գենադի Օնիշչենկոն ավելի վաղ պատրաստակամություն էր հայտնել սկսելու բանակցությունները ռուսական շուկա վրացական արտադրանքների մատակարարումները վերսկսելու վերաբերյալ:
Բանակցությունները նշանակված են փետրվարի 4-ին:
Վրացական պատվիրակության կազմում 7 մարդ է ընդգրկված, այդ թվում պատվիրակությունը գլխավորող Գինու ազգային գործակալության ղեկավար Լեվան Դավիթաշվիլին, նրա խորհրդականը, Գինեգործների ասոցացիայի ղեկավարները, Սննդի անվտանգության ծառայության և Բուսասանիտարական ազգային ծառայության ներկայացուցիչները:
Ավելի վաղ Դավիթաշվիլին հայտարարել էր, որ առաջին հանդիպումը կկրի բացառապես տեխնիկական բնույթ:
