Սիրիահայ գրող, բանաստեղծ Տիգրան Գաբոյանը գոհ է հայաստանյան իշխանությունների՝ անձնապես իր հանդեպ ցուցաբերած վերաբերմունքից: Այս մասին նա ասաց այսօր տեղի ունեցած մամուլի ասուլիսի ժամանակ՝ միաժամանակ հրաժարվելով մանրամասներ ներկայացնել Սիրիայում ներկայումս առկա իրավիճակից ու հայ համայնքի խնդիրներից:
Նա հույս հայտնեց, որ սիրիահայերի հոսքը Հայաստան զգալիորեն կմեծանա, եթե, իհարկե, «Արմավիա»-ի միակ չվերթի գինն ավելի մատչելի դառնա:
«Հայաստան եկել ենք սեփական՝ հագուստի բիզնես հիմնելու նպատակով, և կախված մեր ունեցած հաջողություններից` կտեսնենք՝ ուզում ենք վերադառնալ Սիրիա՞, թե՞ մնալ այստեղ»,- նշեց Տիգրան Գաբոյանը:
Ասուլիսին ներկա` սիրիահայ դեղագործ Կառլոս Գասպարյանն իր հերթին փաստեց, որ ՀՀ սփյուռքի նախարարության հոգածությունը զգացել են դեռ «Զվարթնոց» օդանավակայանից: «Գոհ եմ, մինչ այսօր էլ հետաքրքրվում են մեզնով, ընդառաջում մեր գործերին: Պատրաստվում եմ ՀՀ-ի քաղաքացիություն ձեռք բերել, ընկերներս ՀՀ քաղաքացի դարձել են մոտ վեց ամսում»,- ասաց նա:
Վերջին տարիներին Հայաստանում բնակվող, ռեստորանի սեփականատեր հանդիսացող սիրիահայ Վազգեն Մեսրոպյանը հակառակը` նկատեց, որ սիրիահայերին ՀՀ-ում վերաբերվում են որպես սիրիացիների՝ վիզաների հարցով բազմաթիվ դժվարություններ առաջացնելով:
«Կան մարդիկ, որ մեկ տարի է՝ դիմել են, բայց դեռ ՀՀ անձնագիր չեն ստացել: Մնացած հարցերով հայաստանյան իշխանությունները, չեմ կարող չասել, լավ են վերաբերվում սփյուռքահայերին»,- ասաց նա:
Մեսրոպյանը փաստեց, որ սիրիահայերն այդ երկրում քաղաքական գործընթացներին չեն խառնվում, և ինչպես բոլոր ազգային փոքրամասնությունները` չեզոքություն են պահպանում:
«Այսօր առավոտյան եմ խոսել Սիրիայում բնակվող քեռուս հետ: Ասաց, որ իրավիճակը գնալով թեժանում է: Եղբայրս ու քույրս ավելի վաղ են տեղափոխվել Հայաստան: Ի դեպ, եղբայրս Հայաստան գալիս «Արմավիա»-ի չվերթում ազատ տեղ չի գտել և Հայաստան եկել է Թուրքիայի տարածքով: Այնտեղ՝ սահմանին, նա ոչ մի դժվարություն չի ունեցել:»
Ասուլիսի մյուս բանախոս` ոսկերիչ Վիգեն Պոզեաքալյանը նույնպես հրաժարվելով մանրամասներ ներկայացնել Սիրիայում տիրող իրավիճակից` նշեց միայն, որ սիրիահայ համայնքը ոչ ոքից չի վախենում, պարզապես գնահատականներ տալուց զերծ է մնում` զգուշավորություն պահպանելու նկատառումներից ելնելով:
