Մոտավորապես 20-30 զինվոր է զոհվել զինված ընդհարման հետևանքով, որը ծագել էր այն պահին, երբ ԿԺԴՀ բանակի գլխավոր շտաբի պաշտոնաթող ղեկավար Լի Էն Հոյին փորձել են դուրս բերել աշխատասենյակից: Այս մասին հաղորդում է Gazeta.ru-ն` հղում անելով հարավկորեական The Chosun Ilbo պարբերականին: Հրապարակման հիմքում չճշտված տվյալներ են:
«Փոխհրաձգությունը սկսվել է, երբ փոխմարշալ Չխվե Ռեն Խեն, որը ԿԺԴՀ բանակի գլխավոր քաղաքական բյուրոյի ղեկավարն է, փորձել է ձերբակալել Լի Էն Հոյին` կատարելով նրա հեռացման վերաբերյալ նախագահ Կիմ Չեն Ինի հրամանը: Ամենայն հավանականությամբ, Լի Էն Հոյի թիկնապահները կրակ են բացել»,- նշում է պարբերականը:
Թերթը նաև գրում է, որ փոխհրաձգության ժամանակ Հոն հավանաբար վիրավորվել կամ սպանվել է, քանի որ պաշտոնաթողության մասին հայտարարությունից հետո նա հանրությանը չի երևացել:
«Մենք չենք կարող բացառել փոխմարշալի սպանության կամ վիրավոր լինելու հնարավորությունը, նույնիսկ փոխհրաձգության փաստը 100 տոկոսանոց չէ»,- անանուն աղբյուրին մեջբերում է The Chosun Ilbo-ն:
Նրա խոսքով` ժամանակ է պետք` կատարվածի պատկերը հստակեցնելու համար:
Օրեր առաջ հաղորդվեց, որ Հոն պաշտոնը լքել է առողջական խնդիրների պատճառով, սակայն չէր նշվում, թե ինչ խնդիրներ են անհանգստացնում փոխմարշալին: Կորեայի ժողովրդական բանակի ղեկավար է նշանակվել գեներալ Հոն Էն Չհոլը:
