Ինտերնետ տեսակապի Skype ծառայությունը աշխատում է համակարգում տեղ գտած սխալը շտկելու ուղղությամբ, ինչի հետևանքով օգտատերերի հաղորդագրությունները կարող են ուղարկվել չնախատեսված հասցեատերերի: Այս մասին տեղեկացնում է Engadget.com-ը՝ հղում անելով Skype-ի ադմինիստրացիայի հայտարարությանը:
Ծառայության խոցելիության մասին բարձրաձայնել են օգտատերերը տեխաջակցության ֆորումում: Skype-ը դժվարանում է նշել, թե խնդրի պատճառով քանի երկրի քանի օգտատեր է տուժել, սակայն վստահեցնում է, որ այդ թիվն աննշան է:
Ընկերության ներկայացուցիչները հայտնել են, որ տեղյակ են խնդրի մասին, և խոստացել են այն կարգավորել հնարավորիս շուտ:
«Մենք տեղյակ ենք, որ երկու օգտատերերի միջև ակնթարթային հաղորդագրություններ փոխանակելիս հազվագյուտ դեպքերում տեղեկությունը կարող է հայտնվել չնախատեսված երրորդ անձանց մոտ: Մենք աշխատում ենք այդ խոցելիությունը վերացնելու ուղղությամբ և առաջիկա մի քանի օրերին օգտատերերին կառաջարկենք ներբեռնել տեսակապի թարմացված տարբերակը»,- ասված է հատարարությունում:
Skype ընկերությունը հիմնադրվել է 2003 թվականին: Տեսակապի ծառայությունից օգտվողների թիվը գերազանցում է 500 միլիոնը:
