Հայաստանի քաղաքագետների միության նախագահ Հմայակ Հովհաննիսյանը մտադիր է իր պատգամավորական թեկնածությունն առաջադրել Երևանի թիվ 1 և Գյումրիի թիվ 35 ընտրատարածքներում: Հիշեցնենք, որ Երևանի թիվ 1 ընտրատարածքից պատգամավոր էր ընտրվել ՀՀԿ-ական Ռուբեն Հայրապետյանը, որը «Հարսնաքարի» հայտնի դեպքերից հետո պատգամավորական մանդատից հրաժարվելու դիմում է գրել: Ինչ վերաբերում է Գյումրիի թիվ 35 ընտրատարածքին, ապա այստեղ պատգամավոր էր ընտրվել ԲՀԿ-ական Սամվել Բալասանյանը, որը, ըստ շրջանառվող լուրերի, սեպտեմբերին առաջադրվելու է Գյումրիի քաղաքապետի թեկնածու: Այս երկու ընտրատեղամասերի պատգամավորների տեղերը թափուր մնալուց հետո սեպտեմբերին Հմայակ Հովհաննիսյանը մտադիր է առաջադրել իր թեկնածությունը:
«Առաջին լրատվական»-ի հետ զրույցում Հովհաննիսյանը նշեց, որ իրեն ավելի շատ գրավում է այն, որ առաջադրվելու է որպես անկախ պատգամավոր:
«Մեծամասնական ընտրակարգով մայիսի 6-ին անցկացված ընտրությունները ծառայում էին լծակ համամասնական ընտրակարգով ընտրությունների արդյունքներն ապահովելու համար: Այսինքն` մեծամասնական և համամասնական ընտրակարգով ընտրությունները զուգադրվում էին: Մինչդեռ լրացուցիչ ընտրությունների պարագայում այդպիսի պատկեր չի լինելու, քանի որ համամասնական ընտրակարգով ընտրություններ չեն անցկացվում: Այդ պատճառով անկուսակցական թեկնածուի հնարավորություններն էապես մեծանում են»,- ասաց նա:
Ըստ նրա՝ Քաղաքագետների միության ուսումնասիրություններով բոլոր երկրներում կուսակցականների թիվը ազգաբնակչության թվում 3-5 տոկոս է կազմում: Հմայակ Հովհաննիսյանն ասում է, որ որքան էլ կուսակցական լիդերները ինչ-որ թվեր «կրակեն» իրենց թվաքանակի վերաբերյալ, իրականում ազգաբնակչության ճնշող մեծամասնությունն անկուսակցականներ են: Իսկ Հայաստանի ԱԺ կազմում շատ քիչ թվով անկուսակցական պատգամավորներ կան:
Հարցին, թե հաղթանակի հետ կապված ի՞նչ ակնկալիքներ ունի Հմայակ Հովհաննիսյանը, այն դեպքում, երբ մի կողմից ՀՀԿ-ն, մյուս կողմից ԲՀԿ-ն ջանք չեն խնայի վերոնշյալ ընտրատարածքներում իրենց թեկնածուներին անցկացնելու համար, մյուս կողմից էլ՝ որպես ընդդիմադիր թեկնածու թիվ 1 ընտրատարածքում իր թեկնածությունն է առաջադրելու «Ժառանգություն» կուսակցության անդամ Ստեփան Սաֆարյանը, պատասխանեց. «Ես ապավինելու եմ անկուսակցական զանգվածների ձգտմանը՝ խորհրդարանում ունենալու իրենց խոսնակին, որը կկարողանա պարտադրել վեր կանգնել կուսակցական հատվածապաշտությունից և հարցերի առանցքում համազգային շահերի առաջնայնությունը դնել»:
