Չինաստանում Ճապոնիայի դեսպան Ուիչիրո Նիվային ետ են կանչել Տոկիո: Նրան կանչել են Արևելաչինական ծովում Սենկակու-Դյաոյույտայ վիճելի կղզիների շուրջ միջադեպի վերաբերյալ բանակցությունների նպատակով: Այս մասին հաղորդում է Lenta.ru-ն` հղում անելով «Կիոդո» ճապոնական լրատվական գործակալությանը:
Պեկինի օդանավակայանում Նիվան լրագրողներին հայտնել է, որ Տոկիո է ուղևորվում` իրավիճակի մասին զեկուցելու նպատակով: Դիվանագետը հրաժարվել է հաղորդել, թե երբ կվերադառնա Պեկին կամ երբևէ կվերադառնա՞ արդյոք, սակայն վստահեցրել է, որ վաղ թե ուշ դա տեղի կունենա:
Հուլիսի 11-ին և 12-ին չինական մի քանի ռազմանավեր մտել էին կղզիների ջրատարածք, ինչից հետո Ճապոնիայի արտգործնախարարությունը Չինաստանին բողոքի նոտա հղեց: Ի պատասխան ճապոնական կողմի վրդովմունքին` Չինաստանի ԱԳՆ-ն հայտարարեց` կղզիները չինական պատմական տարածքներ են:
Սենկակու (ճապոնական տարբերակ) կամ Դյաոյույտայ (չինական տարբերակ) կղզիները գտնվում են Թայվանից 170 կմ հյուսիս-արևելք: Չինաստանը հաստատում է, որ այդ տարածքները չինացիների համար բաց են եղել 14-րդ դարում, իսկ Ճապոնիան դրանք խլել է, ըստ չինացիների` ոչ արդար Սիմոնոսեկի պայմանագրով` 1895 թվականին: Երկրորդ աշխարհամարտից հետո Ճապոնիան կորցրել է 19-րդ դարի վերջին ձեռք բերած բոլոր տարածքները, և Սենկակուն հայտնվել է ԱՄՆ-ի վերահսկողության ներքո: 1972 թվականին Վաշինգտոնը կղզիները վերադարձրել է Ճապոնիային, սակայն Չինաստանը հրաժարվում է ճանաչել այդ որոշումը:
Սենկակու-Դյաոյույտայ կղզիները բնակեցված չեն և պատկանում են ճապոնացի մասնավոր անձանց: Վիճելի տարածքների նկատմամբ ճապոնական և չինական կողմերի հետաքրքրությունը մեծացավ այն բանից հետո, երբ այնտեղ հայտնաբերվեցին գազի հանքավայրեր:
