Թեպետ ամբողջ շաբաթ բոլորը մեծ ուշադրությամբ հետևում էին Եգիպտոսում տեղի ունեցող իրադարձություններին, սակայն «Առաջին լրատվականի» ուշադրության կենտրոնում եղել են նաև մի շարք այլ իրադարձություններ:
Սարկոզին ընդունեց, որ Ֆրանսիայում տապալվել է բազմամշակութայնության քաղաքականությունը Ֆրանսիայի նախագահ Նիկոլա Սարկոզին հայտարարել է, որ երկրում տապալվել է բազմամշակութայնության քաղաքականությունը: Սարկոզին նշել է, որ անկասկած դա տապալում է: Նա ասել է, որ Ֆրանսիա ժամանող անձը պետք է դառնա ֆրանսիական ազգի մի մասը, իսկ եթե չի ցանկանում դա անել, ապա կդառնա անցանկալի հյուր այդ երկրում: Ակնհայտ էր, որ մեղադրանքների մեծ մասը, որոնք ուղղված էին օտար երկրներից ժամանածներին, հիմնականում վերաբերում էին մուսուլման բնակչությանը: Սարկոզին ասել է, որ Ֆրանսիան չի պատրաստվում փոխել իր կենսակերպը, իսկ եկվորները պետք է հասկանան, որ տղամարդիկ և կանայք հավասար են, աղջիկները պետք է դպրոց գնան: Բացի այդ, նա հայտնել է, որ ֆրանսիացիները չեն ցանկանում փողոցներում բոլորի աչքի առաջ աղոթող մարդկանց տեսնել:
Ֆրանսիան առաջարկում է ստեղծել եվրոպական բանակ
Ինչպես Մյունխենի անվտանգության քաղաքականության հարցերով միջազգային 47-րդ համաժողովում հայտարարել է Ֆրանսիայի արտաքին գործերի նախարար Միշել Ալիո-Մարին, անհրաժեշտ է զարգացնել Եվրոպայի պաշտպանական ներուժը: «Ամերիկյան հովանոցը մշտական չի լինի: Եվրոպան պետք է զարգացնի սեփական ներուժը` հանուն խաղաղության և միջազգային կայունության»,- նշել է Ալիո-Մարին: Նրա խոսքերով, ԵՄ երկրներում ռազմական ծախսերի կրճատումը հետագայում կարող է հանգեցնել «ԵՄ ռազմավարական դերի կորստին»: Նա նաև կոչ է արել ստեղծել ընդհանուր եվրոպական գլխավոր շտաբ, որը կիրականացնի «գործողությունների ծրագրավորում և անցկացում»: Դա հատկապես անհրաժեշտ է ահաբեկչության և ծովահենության վտանգը չեզոքացնելու համար:
Ռուս-բրիտանական լրագրողական սկանդալ
Մեծ Բրիտանիայի խորհրդարանի անդամ, Լեյբորիստական կուսակցության ներկայացուցիչ Քրիս Բրայանտն առաջարկել է հետ կանչել Ռուսաստանի Դաշնության արտաքին գործերի նախարարին ուղղված՝ Մեծ Բրիտանիա այցելելու հրավերքը, քանի դեռ չի պարզաբանվել բրիտանացի լրագրողի` Մոսկվայից արտաքսվելու հարցը: Հիշեցնենք, որ The Guardian-ի լրագրող Լյուք Հարդինգը արտաքսվել էր Մոսկվայից: Նրան թույլ չէին տվել մուտք գործել Ռուսաստան, ուր նա վերադառնում էր երեքամսյա բացակայությունից հետո: Լյուքը որոշ ժամանակ եղել է թերթի ներկայացուցիչը Ռուսաստանում: Թերթը նշում է, որ Ռուսաստանի իշխանությունների այս քայլը կապված է լրագրողի մասնագիտական գործունեության հետ, որը վերջին շրջանում մի շարք սուր հրապարակումներով է հանդես եկել:
Բեռլուսկոնիին սպառնում է 15 տարվա ազատազրկում
Միլանի դատախազությունը մեղադրանք է ներկայացրել Սիլվիո Բեռլուսկոնիի դեմ: Իտալիայի վարչապետին մեղադրում են անչափահասների հետ սեռական հարաբերություններ ունենալու և պաշտոնական դիրքի չարաշահման մեջ: Ինչպես ակնկալվում է, չորեքշաբթի օրը դատարան կուղարկվի համապատասխան պահանջը: Մեղադրող կողմը պահանջում է չձգձգել փաստաթղթերի քննարկումը և չանցկացնել նախնական լսումներ: Փետրվարի վերջին և մարտի սկզբին կվերսկսվի ևս երկու գործի քննություն՝ կապված Իտալիայի վարչապետի հետ` կոռուպցիայի մեղադրանքով: Եթե Բեռլուսկոնիի մեղքը հաստատվի, ապա նրան սպառնում է ազատազրկում 15 տարի ժամկետով:
Ֆրանսիայի վարչապետը հանգստացել է Մուբարաքի հաշվին
Ֆրանսիայում լուրջ սկանդալ է հասունանում: Ֆրանսիական լրատվամիջոցները պարզել են, որ Ֆրանսիայի վարչապետ Ֆրանսուա Ֆիյոնը և արտաքին գործերի նախարար Միշել Ալիոն-Մարին իրենց արձակուրդներն անցկացրել են մասամբ նաև Եգիպտոսի և Թունիսի ռեժիմների հաշվին: Պարզվել է, որ Ֆրանսիայի վարչապետը Եգիպտոսով ճամփորդել է Հոսնի Մուբարաքի տրամադրած ինքնաթիռով, իսկ արտաքին գործերի նախարարը` Թունիսի դիկտատոր Զին Ալ-Աբիդին բեն Ալիի մերձավոր գործարարներից մեկի ինքնաթիռով: «Օտարերկրացիների կողմից առաջարկված այսօրինակ տարբերակները պետք է այսուհետ ստանան վարչապետի կամ նախագահական նստավայրի համաձայնությունը»,- նշել է Սարկոզին:
Ռուս-ճապոնական «պատերազմ»` Կուրիլյան կղզիների համար
Անցած շաբաթ Ռուսաստանի նախագահ Դմիտրի Մեդվեդևը հայտարարել է Կուրիլյան կղզիները ժամանակակից զինատեսակներով ապահովելու մասին: «Բոլորը պետք է հասկանան, որ Կուրիլյան կղզիները Ռուսաստանի տարածքն է: Զինատեսակները, որ այնտեղ պետք է տեղակայված լինեն, պետք է անհրաժեշտ, բավարար և ժամանակակից լինեն, որպեսզի ապահովվի այդ տարածքների` որպես Ռուսաստանի Դաշնության անբաժանելի մասի անվտանգությունը»,- հայտարարել է Մեդվեդևը:
Այս քայլը հետևել էր դրանից երկու օր առաջ Ճապոնիայի մայրաքաղաքում հակառուսական բողոքի ակցիաներին, ինչպես նաև երկրի ղեկավարի` Մեդվեդևին ուղղված հայտարարություններին: Ճապոնիայի վարչապետն աններելի վիրավորանք էր անվանել Մեդվեդևի այցը Կուրիլյան կղզիներ, որոնք տասնամյակներ շարունակ վիճելի տարածք են համարվում երկու երկրների համար: Իսկ ակցիաների ժամանակ էլ պղծվել էր Ռուսաստանի դրոշը:
