Ինչպես տեղեկացնում են արտասահմանյան լրատվամիջոցները, Ուզբեկստանում Իրանի դեսպան Մոհամեդ Քեշավարզադեն հայտարարել է, որ իր երկիրը պատրաստ է գազ մատակարարել Nabucco խողովակաշարով:
Նա կարծիք է հայտնել, որ ներկայումս այդ նախագծի համար գազի բավարար քանակություն չկա, սակայն Իրանը կարող է իր մասնակցությունն ունենալ` մատակարարելով կապույտ վառելիքի զգալի մասը:
Միևնույն ժամանակ Թեհրանը չի ընդունում տրանսկասպյան գազատարի նախագիծը, քանի որ Կասպից ծովի ստատուսը դեռ հստակեցված չէ: Նշենք, որ այս գազատարի գաղափարին ակտիվորեն աջակցում են Եվրամիությունն ու ԱՄՆ-ը:
Տրանսկասպյան խողովակաշարով կենտրոնական Ասիայի երկրներից վառելիքը պետք է հասցվի Ադրբեջան, այնուհետև միանա Nabucco-ին:
Հիշեցնենք, որ Եվրոպա գազ մատակարարելու համար նախատեսված Nabucco գազատարի հիմնական խնդիրը վառելիքի պակասն է, և առկա ռեսուրսները դեռ չեն բավականացնում խողովակաշարի նախագծային հզորությանը հասնելու համար:
Խողովակաշարի կառուցումը նախատեսված է սկսել այս տարի, իսկ շահագործումը` 2014-15թթ:
