Քաղծառայության համակարգը նախկին տարիների համեմատ բավական սահուն գործընթացի մեջ է մտել, ինչ մասին են վկայում վիճակագրական մի շարք տվյալներ: Այսօր տեղի ունեցած մամուլի ասուլիսի ժամանակ այս մասին ասաց Քաղծառայության խորհրդի նախագահ Մանվել Բադալյանը:
«Այս տարվա առաջին վեց ամիսներին կազմակերպվել են երեք 366 թափուր պաշտոնների մրցույթներ, որոնցից 41-ի դեպքում հաղթողներ չեն ճանաչվել: Ինչպես հայտնի է, քաղծառայողներն ատեստավորում են անցնում երեք տարին մեկ անգամ: Չափանիշներին չհամապատասխանող մասնագետների թիվն, անցած տարիների համեմատ, իջել է երկու-երեք տոկոսով: Սա նշանակում է, որ մարդիկ առավել պատասխանատու են դարձել իրենց աշխատանքի հանդեպ:
Բացի այդ, էականորեն նվազել են այս կամ այն անձի համար միջնորդություններն ու խնդրանքները»,- նշեց նա:
Մանվել Բադալյանը, անդրադառնալով համակարգում սոցիալական փաթեթի ներդրմանը, նկատեց, որ երևույթը բավական մեծ աշխուժություն է առաջացրել քաղծառայողների շրջանում:
«Բացի բուժսպասարկումից` մեր բազմաթիվ աշխատողներ իրենց հասանելի 52000 դրամ սոցիալական գումարը հատկացնում են ամառային հանգստին: Ավելի քան հարյուր մարդ սրտի վիրահատության է ենթարկվել: Հուսով եմ, որ առաջիկայում սոցփաթեթի գումարի չափն էականորեն կմեծանա»:
Քաղծառայության խորհրդի նախագահը հավաստիացրեց, որ համակարգում սոցվճարների ուշացման կամ երկար քաշքշուկների արդյունքում վճարելու հետ կապված դժգոհություններ չկան, ինչպիսիք կային դպրոցներում, և դրանց մասին բարձրաձայնել էր ՀՀ վարչապետը:
Ամփոփելով` Մանվել Բադալյանը հիշեցրեց, որ իր պաշտոնավարման ժամկետն ավարտվում է 2014 թվականի հունվարի 15-ին: