Ռուսաստանից Հայաստան եկող գազատարն անցնում է Վրաստանի տարածքով: Այժմ կան տեղեկություններ, որ Ադրբեջանը չափազանց հետաքրքրված է այդ գազատարով, համենայնդեպս նման հետաքրքրություններ Ադրբեջանում հնչել են:
Վրացի փորձագետ Նիկա Չիտաձեն «Առաջին լրատվականի» հետ զրույցում նշեց, որ այդ տեղեկությունն ինքն առաջին անգամ է լսում. «Չնայած այն հանգամանքին, որ ադրբեջանական «SOCAR»-ը հանդիսանում է Վրաստանի շրջաններ գազ մատակարարող ամենախոշոր կազմակերպությունը, իսկ Վրաստանը ավելի քան 80 տոկոսով կախված է Ադրբեջանից մատակարարվող գազից:
Իրականում Ադրբեջանը կարող է գնել այդ գազատարը, բայց ես կարծում եմ, որ եթե այդ հարցը օրակարգ մտցվի, ապա Վրաստանի իշխանությունները հաշվի կառնեն այն հանգամանքը, որ այդ գազամուղը ուղղվում է Հայաստան, իսկ Վրաստանն ու Հայաստանը, չնայած մի շարք տարաձայնություններին, ընդհանուր շատ բաներ ունեն»:
Անդրադառնալով Սերժ Սարգսյան-Միխեիլ Սահակաշվիլի վերջին հանդիպմանը և այն կարծիքներին, թե Սահակաշվիլին Հայաստան էր եկել միայն դպրոցական օլիմպիադա անցկացնելու նպատակով, Չիտաձեն նշեց, որ անկասկած հիմնական նպատակը դա չէր, և երկու երկրների ղեկավարների քննարկելիք հարցերը շատ են:
Մասնավորապես, Չիտաձեի խոսքերով, հայ-վրացական քննարկելիք հարցերը վերաբերում են առևտրա-տնտեսական հարաբերություններին, այդ թվում նաև Վերին Լարսի անցակետի գործունեությանը, Հայաստանից Վրաստանի հարավային շրջաններով դեպի Սև ծով անցնող ճանապարհի շինարարաությանը, ինչպես նաև Ջավախքի խնդիրներին և գազատարին:
