Ամերիկուհին բողոք է ներկայացրել դատավորի դեմ այն բանից հետո, երբ վերջինս խոստացել է մեղմել դստեր պատիժը, եթե ինքը համաձայնի դատարանի դահլիճում կտրել աղջկա հյուսը։
13-ամյա աղջիկը և նրա 11-ամյա ծանոթը Յուտա նահանգի դատարանի կողմից դատապարտվել էին 30 օրվա կալանքի այն բանից հետո, երբ կտրել էին 3-ամյա մի աղջնակի հյուսը։ Դրանից հետո դատավորը հայտարարել էր, որ կմեղմի զանցանք գործած 13-ամյա աղջկա 30-օրյա պատիժը, եթե նրա մայրը հենց դատարանի դահլիճում կտրի դստեր հյուսը։ Այս մասին հաղորդում է BBC-ն։
Դրանից հետո կինը բողոք էր ներկայացրել և տեղի լրատվամիջոցներին հայտարարել էր, որ դատավորը նման որոշում է կայացրել՝ ելնելով «Ակն ընդ ական» սկզբունքից։ Նշվում է, որ դժվար թե բողոքը բավարարվի, քանի որ Յուտա նահանգի օրենքներով՝ դատավորն իրավունք ունի անչափահասների համար նշանակել ոչ ավանդական պատիժ, եթե դա կուղղի նրանց վարքը։
