Սվերդլովսկի մարզի Վերին Դուբրովո գյուղում,15-ամյա աշակերտուհին օրերս դաժանաբար ծեծել էր 56-ամյա պեդոֆիլին, ինչի արդյունքում տղամարդը մահացել էր: Տեղի ոստիկանությունը հայտնել է, որ աղջիկը բերման է ենթարկվել ոստիկանություն, հարցաքննվել և բնակավայրից չհեռանալու ստորագրությամբ ազատ արձակվել: Ավելի ուշ պարզվել է, որ հարբած տղամարդը աղջկան սկսել է փողոցում անհանգստացնել, քաշքշել, և երբ աղջիկը չի կարողացել բռունցքների հարվածներով հետ մղել նրան և ազատվել, գետնից փայտի մի կտոր է վերցրել ու սկսել դաժանաբար հարվածել պեդոֆիլին, ինչն էլ նրա մահվան պատճառ է դարձել: Հարուցվել է քրեական գործ, որը ամենայն հավանականությամբ կկարճվի անհրաժեշտ պաշտպանության հիմքով:
Իսկ մեզ մոտ՝ Հայաստանում, այդ անչափահաս ռուս աղջնակի պես կարգին «կատաղել» չգիտենք, դրա համար էլ լուրեր են պտտվում, որ մանկապղծության, անչափահասի բռնաբարության մեջ կասկածվող Հարթաշենի գյուղապետ Ազատ Ղուկասյանին ուզում են ազատել: Հիշեցնենք, որ Հարթաշենի գյուղապետ, 50-ամյա Ազատ Ղուկասյանը, որը գյուղի դպրոցում նաև ֆիզկուլտուրայի ուսուցիչ էր աշխատում, ֆիզկուլտուրայի ժամին երեխաներին ասել էր՝ «խելոք խաղացեք», իսկ ինքը 14-ամյա Նինայի (անունը փոխված է) հետ առանձնացել: Երեխաներից մեկը կասկածել ու բանալու անցքից տեսել էր, թե ֆիզկուլտուրայի ուսուցիչն ինչով է զբաղված աշակերտուհու հետ, որը հոգեկան ինչ-ինչ խնդիրներ ունի: Այժմ փորձաքննությունները շարունակվում են:
Մոտ մեկ ամիս առաջ տուժած աղջկա հորեղբայրը` Գագիկ Պարոնյանը, Henaran.am-ի հետ զրույցում ասել էր, որ ըստ փորձաքննությունների` Ազատ Ղուկասյանը բռնաբարել է անչափահասին: Եվ երբ փորձաքննություններից մեկով եզրակացություն էր տրվել, որ աղջիկը հոգեպես անհավասարակշիռ է և նրա ցուցմունքները չի կարելի հիմք ընդունել, տուժողի ներկայացուցիչը կրկնակի փորձաքննություն է պահանջել: Աղջկա հորեղբայրը միաժամանակ նշել էր, որ աղջիկը իր հետ կատարվածը մանրամասնորեն պատմել է ոստիկաններին ու նաև համապատասխան մասնագետների ներկայությամբ:
Երկրորդ փորձաքննությունը կատարվել է Նորքի հոգեբուժական կլինիկայում: Եվ օրերս պարզ կդառնան նաև դրա արդյունքները, բայց շրջանառվող տեղեկությունների համաձայն` գյուղապետ Ազատի հարազատները փորձում են նրան ազատել քրեական պատասխանատվությունից: Հիշեցնենք նաև, որ Ղուկասյանին մեղադրանք է առաջադրվել ՀՀ Քրեական օրենսգրքի 138-րդ հոդվածի 2-րդ մասի 3-րդ կետի հատկանիշներով (բռնաբարություն անչափահասի նկատմամբ), որը նախատեսում է ազատազրկում 4-10 տարի ժամկետով:
Ի դեպ, Սյունիքի մարզում էլ էր նման մի այլանդակություն գրանցվել. բուժզննության արդյունքում պարզվել էր, որ 14-ամյա դեռահաս աղջիկը հղի է: Հետագայում աղջիկը մորն ասել էր, որ սպանության համար նախկինում դատապարտված հայրն է ամիսներ շարունակ իրեն ենթարկել ֆիզիկական ու սեռական բռնության: Մայրը վերջին ամիսներին տեղի ունեցող ծեծի, բռնությունների արդյունքում աղջկա վարքագծում տարօրինակ փոփոխություններ էր նկատել. կապտուկների պատճառով նա հաճախ էր դպրոցից բացակայել: Նրանց էլ մի հասարակական կազմակերպություն էր օգնության ձեռք մեկնել, որպեսզի հայրը նրանց վնաս չպատճառի:
Սակայն մի ահավոր դեպք էլ Ապարանում էր եղել. անցյալ տարի, սովորականի պես դատարանում էի, և դատարան եկած մի տատիկից պատահմամբ իմացա նրա՝ դատարան գալու պատճառը. փեսան՝ դստեր ամուսինը, իր անչափահաս որդուն էր ստիպել սեռական հարաբերություն ունենալ իր հետ, քանի որ կնոջ կանացի օրգանները հեռացված էին եղել: Հայրը որդու հետ էր քնել, իսկ մայրը մի օր արթնացել էր որդու տարօրինակ տնքոցներից, և երբ բացել էր սենյակի դուռը՝ զարհուրելի մի բան էր տեսել: Հետո, երբ փորձել էր այդ մասին ասել սկեսրոջը, սկեսրայրին, գյուղապետին՝ ամուսինն ուղղակի հարձակվել էր նրա վրա ու դաժանաբար սպանել: Ընտանիքի հորն ուղարկել էին բանտ, իսկ առանց ծնողների խնամքի մնացած երեխաները, եթե չեմ սխալվում՝ տեղափոխվել էին մանկատուն…
Հ.Գ. Ցավոք, հայկական իրականության մեջ նաև այսպիսի «կատարելագործված» պեդոֆիլներ կան, որոնց ռուս աղջկա պես «սատկացնող» տեսակ է պետք:
