Տնտեսությունը պետք է լինի մրցունակ: Սա կառավարության 2012-2017 թթ. գործունեության ծրագրի առաջին գերակայությունն է, որ այսօր Ազգային ժողովի արտահերթ նստաշրջանում ներկայացրեց վարչապետ Տիգրան Սարգսյանը: Նրա խոսքով՝ ծրագրի արմատական փոփոխությունն այն է, որ պետությունը պատասխանտու է լինելու ոչ միայն բիզնես միջավայրի համար, այլև մասնակցելու է արդյունաբերության ճյուղային զարգացմանը: Նա հիշեցրեց, որ մշակվել են արդյունաբերական 11 ուղղություններ, ազատ տնտեսական երկու գոտիներ, ստեղծվելու է վենչուրային հիմնադրամ, դրամաշնորհների միջոցով խրախուսելու են կրթություն-արդյունաբերություն կապը, խրախուսելու են սփյուռքահայերի ներգրավումը բիզնեսում և այլն:
Կառավարության երկրորդ գերակայությունն է մարդկային կապիտալի զարգացումը: Տ. Սարգսյանի խոսքով՝ «յուրաքանչյուր քաղաքացի պետք է հնարավորություն ունենա կերտելու իր երջանկությունը հայրենիքում»: Կառավարությունը խոստանում է նաև 100 հազ. աշխատատեղերի ստեղծում և արդարության ապահովում, յուրաքանչյուր առաջին դասարանցուն տրամադրել համակարգիչ, վերնայվելու է բուհական կրթական համակարգը՝ աստիճանաբար վերացնելով քննական համակարգը, այսինքն՝ ըստ վարչապետի, ընդունվելը կլինի հեշտ, ավարտելը` դժվար:
Վարչապետը խոսեց նաև հայկական հեռուստատեսությունը ողողած սերիալների մասին՝ նշելով, որ դրանք ցուցադրելու են ազգային արժեքները:
Ծրագրի երրորդ գերակայությունը ինստիտուցիոնալ կարողություների զարգացումն է: Ըստ Տ.Սարգսյանի՝ պետք է արդարություն հաստատել մեր կյանքի բոլոր ոլորտներում, ապահովել տնտեսական օգուտների արդար բաշխումը:
«Մեր քաղաքացիները պետք է զգան, որ ապրում են պաշտպանված, ապահով երկրում»,- ասաց Տ. Սարգսյանը` նշելով, որ ապահովվելու է նախորդ ծրագրի շարունակականությունը՝ իրականացնելով ճգնաժամի պատճառով չիրականացված միջոցառումները:
«Նոր Հայաստան կերտելու պատմական հնարավորությունը մեր ձեռքերում է: Առանց չափազանցության: Յուրաքանչյուրի ձեռքերում: Եվ մենք դա անելու ենք»,- շեշտեց վարչապետը:
Հավելենք, որ Տ. Սարգսյանին հարցեր տալու համար հերթագրվել է մոտ 20 պատգամավոր:
