Ճապոնիայի արևմուտքում չեղյալ է համարվել ավելի քան 400 ներքին և միջազգային չվերթ՝ կապված մոտեցող «Գուչոլ» թայֆունի հետ: Այս մասին հաղորդում է RIA Novosti-ն՝ վկայակոչելով NHK հեռուստաալիքը:
Երեքշաբթի՝ տեղի ժամանակով ժամը 16:00-ի դրությամբ, չեղյալ է համարվել 392 չվերթ: Շուրջ 40 հազար մարդ նախազգուշացվել է հնարավոր տարհանման մասին:
Բացի այդ, տեղի ԶԼՄ-ների փոխանցմամբ՝ «Արևմտյան Ճապոնիայի երկաթուղիներ» ընկերությունը շտապ խորհրդակցություն է անցկացնում՝ նախազգուշական քայլեր ձեռնարկելու և գնացքների հետագա գրաֆիկը կազմելու համար:
Այս պահին «Գուչոլ» թայֆունը գտնվում է երկրի հարավ-արևելքում, իսկ երեկոյան կհասնի Հոնսյու կղզու կենտրոնական հատված: Թայֆունի կենտրոնում ճնշումը կազմում է 960 հեկտոպասկալ, իսկ քամու արագությունը՝ 190 կմ ժամ:
«Գուչոլը» հյուսիս-հյուսիս-արևելք է շարժվում 55 կմ ժամ արագությամբ: Օդերևութաբանները զգուշացնում են, որ թայֆունի մոտեցումը կուղեկցվի հորդառատ անձրևներով, իսկ մեկ ժամվա ընթացքում տեղումների քանակը կարող է հասնել մինչև 80 մմ-ի:
