Այսօր Փարիզում տեղի ունեցած Նալբանդյան-Մամեդյարով հանդիպումը կարևոր կարելի էր համարել, եթե նոր առաջարկներ քննարկվեին: «Առաջին լրատվական»-ի հետ զրույցում այս մասին ասաց ՌԱՀՀԿ ղեկավար, քաղաքագետ Մանվել Սարգսյանն` անդրադառնալով հանդիպման վերաբերյալ ԵԱՀԿ տարածած հաղորդագրությանը:
Ըստ քաղաքագետի` ԱՄՆ պետքարտուղար Հիլարի Քլինթոնի այցը տարածաշրջան հետաքրքրական էր նրանով, որ նա ասաց, թե Փարիզում Ադրբեջանի և Հայաստանի արտգործնախարարների հանդիպմանը Մինսկի խմբի համանախագահների կողմից կարող են նոր առաջարկներ լինել: «Բայց ԵԱՀԿ հայտարարությունից հասկացա, որ դրա մասին որևէ խոսք չկա: Եթե այս հանդիպմանը նոր առաջարկներ լինեին, դա կարելի էր կարևոր հանդիպում համարել. կրկնվեց այն ամենը, ինչ կրկնվել էր միշտ: Այստեղ կարևոր է այն հանգամանքը, որ նորից շփման գծում միջադեպերի ուսումնասիրման մեխանիզմն ընդգծվեց, որն էական է: Ադրբեջանն այդ մեխանիզմի ներդրմանն ամեն կերպ խոչընդոտում էր, եթե այս հարցի շուրջ ինչ–որ պայմանավորվածություններ եղել են, դա կարելի է մեկ քայլ առաջ համարել, եթե ոչ` նորություն չկա»,- հանդիպման մասին ԵԱՀԿ հաղորդագրությունից հայտնի մանրամասները մեկնաբանեց Մանվել Սարգսյանը:
Անդրադառնալով շփման գծում հրադադարի ռեժիմի խախտման դեպքերը հետաքննելու մեխանիզմի ստեղծմանը` նա ասաց, որ եթե նման մեխանիզմ ստեղծվի Մինսկի խմբի հովանու ներքո, շատ էական կլինի, քանի որ այն կդառնա շփման գծում միջադեպերի վերահսկման մեխանիզմ: Նրա կարծիքով` այս դեպքում Ադրբեջանի համար արդեն իսկ դժվար կլինի սահմանային միջադեպերը, խախտումներն օգտագործել դիվանագիտական նպատակներով: «Քանի որ Ադրբեջանն է խախտում հրադադարի ռեժիմն անընդմեջ, կկանգնի որոշակի խնդրի առջև»,- եզրափակեց իր խոսքը Մ. Սարգսյանը:
Նշենք, որ Փարիզում Նալբանդյան-Մամեդյարով հանդիպումից հետո ԵԱՀԿ-ն հայտարարություն էր տարածել: Արտգործնախարարների փարիզյան հանդիպմանը ներկա են եղել նաև ԵԱՀԿ Մինսկի խմբի համանախագահներ Ռոբերտ Բրադտկեն (ԱՄՆ), Ժակ Ֆորը (Ֆրանսիա) և Իգոր Պոպովը (Ռուսաստան), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը: Համանախագահներն արտգործնախարարների հետ քննարկել են ղարաբաղյան հակամարտության կարգավորման ուղիները, ինչպես նաև՝ հետագա քայլերը՝ հումանիտար, հրադադարի ռեժիմի խախտման դեպքերը հետաքննելու մեխանիզմի ստեղծման, պատմական և մշակութային նշանակություն ունեցող օբյեկտների պահպանման ոլորտներում:
Հաղորդագրության վերջում նշված էր, որ հանդիպումն անցել է դրական, կառուցողական մթնոլորտում: Որպես հաջորդ քայլ՝ համանախագահներն առաջիկա շաբաթներին կժամանեն տարածաշրջան:
