Շվեդական Expressen թերթը Բիգ Բենի վրա պատկերել է Շվեդիայի հավաքականի ֆուտբոլիստ Զլատան Իբրահիմովիչի լուսանկարի լուսային արտացոլումը: Ակցիան կազմակերպվել է «Եվրո-2012»-ի Շվեդիա-Անգլիա խաղի նախօրեին:
Իբրահիմովիչի նկարը «զարդարվել է» «Շվեդիա՛, առաջ» կարգախոսով: Թերթի թղթակիցներն ակցիայի անցկացման պահին եղել են Բիգ Բենի մոտ և գրանցել են ականատեսների արձագանքը:
The Local-ը գրում է, որ ավելի վաղ շվեդական Aftonbladet թերթը հրատարակել էր բրիտանական տապլոիդների կեղծ շապիկներ, որոնք իբր լույս են տեսել խաղի անմիջապես հաջորդ օրը: Յուրաքանչյուր թերթի առաջին էջը պատմում է Անգլիայի՝ Շվեդիայից կրած ջախջախիչ պարտության մասին: Այսպես, The Daily Mirror-ի շապիկի վրա պատկերված է եղել Անգլիայի հավաքականի դարպասապահ Ջո Հարթը (Joe Hart) «Կոտրված սիրտը» (Broken Hurt) վերնագրով:
Ի պատասխան՝ The Daily Mirror-ի խմբագրությունը թողարկել է Aftonbladet-ի կեղծ շապիկը, որում պատկերված է Զլատան Իբրահիմովիչը՝ Zlatastrof վերնագրով:
Հիշեցնենք, Շվեդիա-Անգիա խաղը տեղի կունենա այսօր, Երևանի ժամանակով 22:45-ին:
