«Մեր հիմնական գաղափարախոսությունը ՓՄՁ-ներին օգնելն է: Մրցակցությունը լավ բան է: Մենք աշխատում ենք 4 ուղղություններով, որոնք համարում ենք աճի պոտենցիալ ունեցող: Դրանք են` բարձր տեխնոլոգիաները, տուրիզմը, դեղագործությունը, սննդի վերամշակումը: Սրանք այն արժեշղթաներն են, որոնց զարգացման համար տրամադրում ենք ռեսուրսներ, տեխնիկական աջակցություն»,- այսօր հայտարարեց ԱՄՆ դեսպան Ջոն Հեֆերնը` «Մրցակցության խնդիրներ, վերլուծություն և լուծումներ» համաժողովի ժամանակ: Համաժողովը կազմակերպվել է ԱՄՆ ՄԶԳ Ձեռնարկությունների զարգացման և շուկայի մրցունակության ծրագրի, ՀՀ ՏՄՊՊՀ և ՀՀ-ում Ամերիկյան առևտրի պալատի կողմից:
Ջ. Հեֆերնը հայտնեց, որ ծրագրի շրջանակներում տրամադրում են ռեսուրսներ մի քանի հայկական բանկերի` տնտեսությունը վարկավորելու համար: Նա կարևորեց գործարարության համար նպաստավոր միջավայրի ստեղծումը:
«Դասերից մեկը, որ սովորեցի այստեղ, այն է, որ աշխարհով մեկ սփռված հայերը ձեռնարկատիրական առումով շատ հաջող են՝ ամենուր փոքր ձեռնարկություններ են հիմնում: Մշակութային առումով ոչ մի խնդիր չկա, որ հայերը նաև Հայաստանում հաջողության հասնեն: Ուզում ենք այդօրինակ աճի հասնել ՀՀ բոլոր սեկտորներում: Սա հեշտ չէ, փոքր քայլերով ենք սկսում և հույս ունենք, որ կտարածվի մյուս ճյուղերում»,- ասաց ԱՄՆ դեսպանը` շեշտելով, որ մրցակցային միջավայրի ապահովման համար հարկավոր է քաղաքական կամք:
ՏՄՊՊՀ նախագահ Արտակ Շաբոյանի խոսքով՝ մրցակցային ոլորտը մշտապես գտնվում է ՀՀ իշխանությունների ուշադրության կենտրոնում: Նա վստահեցրեց, որ այսօր առկա է քաղաքական կամք` տնտեսական մրցակցության բնագավառում լուրջ բարեփոխումներ և արդյունավետություն ապահովելու համար:
«Մենք աշխատում ենք այն մոտեցմամբ, որ արդար մրցակցային դաշտի առկայությունը խիստ կարևոր է ոչ միայն տնտեսական աճի և բարեկեցության բարձր մակարդակի, այլ նաև միջազգային մրցունակության ապահովման, ինչպես նաև սպառողների շահերի պաշտպանության տեսանկյունից, ինչին էլ ուղղված է Հանձնաժողովի գործունեությունը»,- ասաց Ա. Շաբոյանը:
