Ադրբեջանական Turan լրատվական գործակալության փոխանցմամբ՝ Ադրբեջանի Միլլի մեջլիսը (խորհրդարան) երեկվա արտահերթ նստաշրջանում սահմանափակող ուղղումներ է մտցրել «Տեղեկատվության ստացման մասին» օրենքում: Այդ նիստից առաջ պատգամավոր Իգբալ Աղազադեն այդ ուղղումները որակել է որպես հակասահմանադրական:
Նա, մասնավորապես, հայտարարել է. «Օրինագծում ասված է, որ տեղեկատվության ստացումը թույլատրվում է այն դեպքում, եթե այն վնաս չի հասցնում քաղաքական, տնտեսական, արժույթա-ֆինանսական ու վարկային, ռազմական ոլորտներում Ադրբեջանի շահերին, ինչպես նաև չի հակասում հասարակական բարոյականությանը, չի խախտում այլ անձանց իրավունքներն ու ազատությունները, նրանց կոմերցիոն ու այլ տնտեսական շահերը, չի խաթարում դատարանի վարկն ու անկողմնակալությունը: Տեսեք, թե միանգամից որքան սահմանափակումներ են մտցվում, և այդ ամենն արվում է միայն մեկ նպատակով՝ հասարակությանը թույլ չտալ տեղեկատվություն ստանալ իշխանությունների մասին»:
Այս ուղղումների օգտին քվեարկել է 97 պատգամավոր, իսկ դեմ՝ 4 պատգամավոր:
