Ռուսական Интерфакс լրատվական գործակալության փոխանցմամբ՝ վրացի ընդդիմադիր միլիարդատեր, «Վրացական երազանք» քաղաքական կոալիցիայի առաջնորդ Բիձինա Իվանիշվիլին Քութայիսում տեղի ունեցած հանրահավաքի ժամանակ խոստացել է գալ իշխանության.
«Երկիրը, որում քաղաքականությունն ու բիզնեսը գտնվում են մեկ մարդու՝ Միխեիլ Սաակաշվիլիի ձեռքում, չունի հեռանկար: Մենք անպայման կգանք իշխանության և կհաստատենք կարգուկանոն ու արդարություն: Մենք դատարանն ու ոստիկանությունը կազատենք իշխանությունների քաղաքական ճնշումներից:
Սաակաշվիլին ու նրա շրջապատը ծախսում են 2008 թվականի օգոստոսյան պատերազմից հետո գործընկեր երկրների կողմից Վրաստանին հատկացված գումարները: Դրանք ժողովրդական գումարներ են, որոնք ստիպված են վերադարձնել մեր երեխաներն ու թոռները: Իմ իշխանության գալու դեպքում ստեղծվելու են ամենաբարենպաստ պայմանները՝ բիզնեսի զարգացման ու էլիտար կոռուպցիան արմատախիլ անելու համար:
Թոշակները բարձրացվելու են, հասանելի է դառնալու բժշկական սպասարկումը: Մենք ստեղծում ենք 1 միլիարդ լարի (617 միլիոն դոլար) գումարով հիմնադրամ գյուղատնտեսության զարգացման համար»: