«Բնական աղետների պատճառով առաջացած վթարների համար ԱՊՊԱ համակարգը չի փոխհատուցում: ԱՊՊԱ պայմանագիր կնքած ընկերությունը վճարում է այն ժամանակ, երբ վնասը պատճառվում է իր հաճախորդի մեղավորությամբ: Այսպիսի դեպքերում վարորդը ստիպված կլիներ ինքը վճարել վնասի փոխհատուցումը, եթե ԱՊՊԱ պայմանագիր չունենար»,- «Առաջին լրատվականին» հայտնում է Հայաստանի ավտոապահովագրողների բյուրոյի մամլո խոսնակ Արմինե Հակոբյանը:
Ըստ նրա` գործնականում հնարավոր չէ, որպեսզի միայն ձյունը կամ սառույցը լինեն ավտովթարի պատճառ: Այդպիսի վթարների դեպքում անցկացվում է քննություն և պարզվում է` որ վարորդն է ոչ պրոֆեսիոնալ վարել մեքենան:
«Ճանապարհների անսարքության պատճառով վթարների դեպքում ապահովագրական ընկերությունը վճարում է տուժած կողմին, բայց հետադարձ պահանջի իրավունքով ընկերությունը կարող է գումարը հետ վերցնել նրանից, ով պատասխանատու է ճանապարհների անսարքության համար, տվյալ դեպքում` քաղաքապետարանից»,- ասում է Արմինե Հակոբյանը:
Այս ընթացակարգը սահմանված է ապահովագրության մասին ՀՀ օրենքում, որը, Հակոբյանի խոսքով, մշակվել է` հաշվի առնելով միջազգային փորձը ու ադապտացնելով այն տեղական առանձնահատկություններին:
Օրենքին և բյուրոյի կողմից սահմանված չափանիշներին պետք է ենթարկվեն Հայաստանում գործող բոլոր ապահովագրական ընկերությունները: