ՀՖՖ-ի նախագահ, Հանրապետական կուսակցության անդամ, ԱԺ պատգամավոր Ռուբեն Հայրապետյանը հեռախոսազրույցի ժամանակ հայհոյել է «Հետքի» լրագրողներից մեկին: Լրագրողը ցանկացել է պարզել, թե ինչ բարոյական վնաս է կրել «Հայկական ժամանակ» թերթը պատգամավորի դատական հայցից հետո, Ռուբեն Հայրապետյանը պատասխանել է իրեն հատուկ «բարյացակամությամբ».
«Էդ ի՞նչ թերթ ա, օրական ըտենց մի թերթ ա բացվում, ու որոշում եք, որ ինձ պիտի զանգե՞ք: Տգետ, ես լրատվական ծառայություն ունեմ, «չերեզ» լրատվական ծառայություն իմ հետ կապնվի»,- ասել է պատգամավորը ու սեռական բնույթի հայհոյանքներ տվել:
Այսօր «Հետքը» նամակ է ուղարկել Սերժ Սարգսյանին, որին կից նաև Ռուբեն Հայրապետյանի հետ հեռախոսազրույցի ձայնագրությունը.
«Հարգելի պարոն Սարգսյան, բազմիցս հայտարարել եք պաշտոնյայի օրինակելի վարքագծի անհրաժեշտության, հակառակի անընդունելիության և այդ պարագայում պատժի անխուսափելիության մասին,- գրված է նամակում,- ՀՀԿ խորհրդի անդամ Ռուբեն Հայրապետյանն իր վիրավորանքներով և անպարկեշտ արտահայտություններով նսեմացրել է լրագրողի պատիվն ու արժանապատվությունը: Նման պահվածքով Ռ. Հայրապետյանը ոչ միայն վարկաբեկում է իրեն, այլև աղավաղում պաշտոնյայի կերպարը:
Հաշվի առնելով, որ Ռ. Հայրապետյանը ՀՀԿ խորհրդի անդամ է, խնդրում ենք նրա վարքագիծը քննարկման առարկա դարձնել կուսակցության խորհրդում և անհրաժեշտ միջոցներ ձեռնարկել, որպեսզի Ռուբեն Հայրապետյանն իրեն անպատիժ չզգա»:
«Հետքը» գլխավոր դատախազ Աղվան Հովսեփյանին նույնպես նամակ է ուղարկել «Հաղորդում հանցագործության մասին» ու կից ներկայացրել նաև ձայնագրությունը:
Ստորև ներկայացնում ենք նամակի բովանդակությունը.
«Հարգելի պարոն Հովսեփյան,
Ս.թ. փետրվարի 2-ին «Հետք» թերթի լրագրող Գրիշա Բալասանյանը զանգահարել է ԱԺ պատգամավոր Ռուբեն Հայրապետյանի բջջային հեռախոսին` տեղեկատվություն ստանալու համար: Ներկայանալուց հետո Ռուբեն Հայրապետյանն ասել է. «Էդ ի՞նչ թերթ ա, օրական ըտենց մի թերթ ա բացվում, ու որոշում եք, որ ինձ պիտի զանգե՞ք»:
«Իսկ Ձեզ զանգելն արգելվա՞ծ է»,- հարցրել է «Հետքի» լրագրողը Ռուբեն Հայրապետյանին:
«Տգետ, ես լրատվական ծառայություն ունեմ, «չերեզ» լրատվական ծառայություն իմ հետ կապնվի»,- ասել է պատգամավորը և անջատել հեռախոսը:
Գրիշա Բալասանյանը լուսաբանում է ԱԺ-ի աշխատանքները և շատ լավ տեղյակ է, որ ԱԺ որևէ պատգամավոր մամուլի ծառայություն չունի: Ինքը` Ռուբեն Հայրապետյանը, մամուլի ծառայություն ունի ֆուտբոլի ֆեդերացիայում, բայց լրագրողը ֆուտբոլին վերաբերող տեղեկություն չէ, որ նրանից ուզում էր ճշտել:
Հետևաբար, լրագրող Գրիշա Բալասանյանը կրկին զանգահարել է Ռ. Հայրապետյանին` պարզելու, թե ինչու է պատգամավորն իրեն վիրավորում և տգետ անվանում միայն այն բանի համար, որ ինքն իր մասնագիտական գործունեությունն է իրականացնում և ընդամենը փորձում է պատգամավորից` պետական պաշտոնյայից, տեղեկություններ ստանալ: Ռուբեն Հայրապետյանը նախ ճշտել է` արդյոք զրույցը ձայնագրվո՞ւմ է, և երբ լրագրողը տեղեկացրել է, որ, այո, ձայնագրվում է, սկսել է սեռական բնույթի հայհոյանքներ տալ լրագրող Գ. Բալասանյանին: Ավելին` հայհոյանքներ տալուց հետո ավելացրել է. «լավ արեցի» ու շարունակել հայհոյել:
Պատգամավորը ակնհայտ խոչնդոտել է լրագրողի մասնագիտական օրինական գործունեությունը` ՀՀ Քրեական օրենսգրքի 164-րդ հոդված:
Ուստի, խնդրում ենք միջոցներ ձեռնարկել ԱԺ պատգամավոր Ռուբեն Հայրապետյանին քրեական պատասխանատվության ենթարկելու համար:
Հաղորդմանը կցվում է «Հետք» շաբաթաթերթի «N4 (64) փետրվարի 3-9, 2011» համարը` համապատասխան հոդվածի առկայությամբ, հեռախոսազրույցի ձայնագրությունը` խտասկավառակի վրա: Անհրաժեշտության դեպքում պատրաստ ենք տրամադրել ձայնագրության բնօրինակը:
Հարգանքներով`
«Հետաքննող լրագրողներ» ՀԿ նախագահ,
«Հետք» թերթի գլխավոր խմբագիր Էդիկ Բաղդասարյան
«Հետք» թերթի լրագրող Գրիշա Բալասանյան»
