Ռուսական ВЗГЛЯД թերթի փոխանցմամբ՝ Աբխազիան ու Հարավային Օսիան այսօր բացասաբար են արձագանքել ԱՄՆ պետքարտուղար Հիլարի Քլինթոնի կողմից երեկ Բաթումիում արված կոչին, որում խոսք էր գնում իրենց բնակիչների համար Վրաստանի առաջարկած չեզոք անձնագրերի ճանաչման համար:
Աբխազիայի փոխարտգործնախարար Իրակլի Խինտբան հայտարարել է, որ իրենց համար անընդունելի են այդ փաստաթղթերը, և որ իրենք իրենց այդ դիրքորոշումը հերթական անգամ կներկայացնեն հունիսի 7-8-ին Կովկասի անվտանգության վերաբերյալ Ժնևյան բանակցությունների 20-րդ փուլում:
Նա հավելել է, որ այդ հանդիպման ժամանակ Աբխազիան առաջարկելու է ճանաչել միջազգային բոլոր չափորոշիչներին համապատասխանող իր փաստաթղթերը: Իսկ Հարավային Օսիայի ԱԳՆ-ն լուրջ մտահոգություն է հայտնել՝ կապված Հիլարի Քլինթոնի տվյալ հայտարարության հետ:
Հարավային Օսիայի ԱԳՆ-ի տարածած հայտարարության մեջ Քլինթոնի խոսքերը որակված են որպես հանրապետության ներքին գործերին միջամտելու փորձ՝ ընդգծվելով, որ Քլինթոնը չափն անցել է: Հարավային Օսիայի ԱԳՆ-ն անիրատեսական է որակել Վրաստանի առաջարկած այդ չեզոք անձնագրերը: