Ի՞նչ ակնկալիքներ ունի ՀՀ քաղավիացիայի վարչության նախկին պետ Շահեն Պետրոսյանը փետրվարի 18-ին Հայ ազգային կոնգրեսի հրավիրած հանրահավաքից:
«Ես կարծում եմ, որ մեր իշխանությունները պետք է հեռանան սահմանադրական ճանապարհով: Ցանկալի չէ, որ մեր երկրում էլ տեղի ունենան այն գործընթացները, որոնք տեղի են ունենում այսօր արաբական աշխարհում: Սերժ Սարգսյանը պետք է հրաժարական տա և հեռանա: Հայաստանն այսօր գտնվում է ռուսական ազդեցության ներքո. Ռուսաստանից մեր իշխանություններին ասում են` մնացեք, իրենք մնում են»,- «Առաջին լրատվական»-ի հետ զրույցում նշեց Շահեն Պետրոսյանը:
Մեր զրուցակիցը կարծում է, որ պետք է մտածել Լեռնային Ղարաբաղի հարցը լուծելու մասին: Իսկ դա, ըստ Շահեն Պետրոսյանի, հնարավոր է այն դեպքում, երբ Հայաստանը և Ադրբեջանը միմյանց հետ բանակցեն` առանց միջնորդների: Նա կարծում է, որ Հայաստանն ու Ադրբեջանը պետք է գտնվեն անվտանգության նույն համակարգում` լինի դա Եվրամիությունը, ՆԱՏՕ-ն, ԵԱՀԿ-ն, թե ՀԱՊԿ-ն: Իսկ հայ ժողովրդի փրկությունը նա տեսնում է ռուսական ազդեցությունից դուրս գալը և Եվրամիությանն անդամակցելը:
«Ռուսաստանն ինքը այսօր ունի բազմաթիվ խնդիրներ: Նա չի կարողանում լուծել իր խնդիրները: Եվ այդ խնդիրները տարածվում են նաև մեր երկրի վրա»,- ասաց Շահեն Պետրոսյանը:
