Ինչպես հայտնի է, Երևանի քաղաքապետարանը որոշել է, որ փետրվարի 15-ից մինչև մարտի 15-ը «Ազատության» հրապարակում սպորտային և մշակութային միջոցառումներ են իրականացվելու, այսինքն` փետրվարի 18-ին Հայ ազգային կոնգրեսի անցկացնելիք հանրահավաքից երեք օր առաջ:
«Առաջին լրատվական»-ը դիմեց ՀԱԿ համակարգող Լևոն Զուրաբյանին` նախ քաղաքապետարանի որոշումը գնահատելու խնդրանքով. «Սա վկայում է այն մասին, որ իշխանությունները նորից առաջնորդվում են նույն ողորմելի միջոցներով. տարբեր «արդարացումներ» են գտնում: Նոր քաղաքապետը նույնքան խաբեբա է, որքան նախկինը, և սա իշխանության դիրքորոշումն է: Այժմ էլ բերելու են երեխաների, մարզիկների` կարծես մարզային այլ դահլիճ, սրահ չկար` հիմա էլ «Ազատության» հրապարակն են ուզում մարզադաշտ դարձնել»:
Իսկ որո՞նք են լինելու ՀԱԿ-ի հետագա քայլերը. հարցրինք ՀԱԿ համակարգողին: Լ.Զուրաբյանը պատասխանեց. «Ազատության հրապարակ մտնելու հարցը կարող է ընդունվել ցանկացած պահի, երբ մենք դա նպատակահարմար գտնենք, և դա կախված է լինելու այդ որոշման ընդունման պահին արդյո՞ք քաղաքական բոլոր անհրաժեշտ գործոնների համաստեղությունը հասունացել է»:
Իսկ ՀԱԿ-ը շարունակելու է Ազատության հրապարակում հանրահավաք անցկացնելու համար դիմել քաղաքապետարան` «Առաջին լրատվական»-ին պարզաբանեցին ՀԱԿ կենտրոնական գրասենյակում: Այսինքն`անգամ եթե Մատենադարանի տարածքն է հնարավարությունը հանրահավաք անցկացնելու համար, Մատենադարանի համար ՀԱԿ-ը հայտ չի ներկայացնելու, քանի որ նպատակը «Ազատության հրապարակն» է: