Ռուսական Regnum լրատվական գործակալության փոխանցմամբ՝ Թուրքիայի ԱԳՆ-ում եղած աղբյուրն արձագանքել է Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչի՝ այսօր թուրքական կողմին արած այն զգուշացմանը, որում նշված էր, որ Ստամբուլում իրականացվել են մի շարք ակնհայտ հակառուսական միջոցառումներ, որոնց ժամանակ անթույլատրելի հայտարարություններ են արվել Ռուսաստանի ու նրա ղեկավարության հասցեին:
Այս կապակցությամբ դիվանագիտական աղբյուրը նշել է. «Մենք ուշադրության տակ ենք առել Թուրքիայի տարածքում, այսպես կոչված, մի շարք հակառուսական կոնֆերանսների վերաբերյալ ռուսական կողմի մտահոգությունները: Թուրքական կողմը հավատարիմ է Ռուսաստանի հետ բարեկամությանն ու բարիդրացիությանը:
Ռուսաստանը Թուրքիայի կարևոր գործընկերն է: Անկարան մոտ ժամանակներս կհետազոտի ռուսական կողմի դժգոհությունները և կհայտնի իր վերաբերմունքը: Սակայն ցանկանում եմ ևս մեկ անգամ նշել, որ Անկարան մտադիր է բոլոր ուղղություններով խորացնել և զարգացնել Ռուսաստանի հետ իր հարաբերությունները»:
