Lenta.ru-ն, վկայակոչելով իսրայելական ԶԼՄ-ներին, հայտնում է, որ արտաքսման մեջ գտնվող Իրանի վերջին շահի Ռեզա Փեհլևիի որդին Իսրայելին կոչ է արել աջակցել իր հայրենիքում աստվածապետական ռեժիմի գահընկեցությանը:
Դրա հետ մեկտեղ Փեհլևին հայտարարել է, որ Իրանի միջուկային օբյեկտների ռմբահարումը որևէ դրական փոփոխություն չի առաջացնի տարածաշրջանում. «Այդ հարվածը չի ոչնչացնի միջուկային ծրագիրը, փոխարենը միայն կկանգնեցնի այն: Համայն աշխարհի համար առաջնահերթ է Իրանում գործող ռեժիմի փոփոխումը:
Իրանին հարվածելուն ԱՄՆ-ի հնարավոր մասնակցությունը նույնպես արդյունավետ չէ, քանի որ դա կհանգեցնի իրաքյան սցենարով պատերազմի առաջացմանը: Իրանի դեմ սահմանված պատժամիջոցները նույնպես չեն աշխատում, քանի որ դրանք թուլացնում են ոչ թե Իրանի իշխանություններին, այլ՝ ժողովրդին:
Պետք է քրեական պատասխանատվության ենթարկել Իրանի գերագույն ղեկավար ու հոգևոր առաջնորդ, այաթոլլահ Ալի Խամենեին՝ սեփական ժողովրդի հանդեպ գործած բազմաթիվ հանցանքների համար: Նա պետք է պատասխան տա այդ ամենի համար»:
Հիշեցնենք, որ 1978 թվականի հունվարից Իրանի շահ Մոհամադ Ռեզա Փեհլավիի արևմտամետ քաղաքականության դեմ ցույցեր սկսվեցին երկրում: 1 տարի անց շահը փախչում է Իրանից, իսկ երկրից աքսորված հոգևոր առաջնորդ այաթոլլահ Խոմեյնին վերադառնում է Թեհրան և ղեկավարում է Իսլամական հեղափոխությունը:
Իրանը պաշտոնապես Իսլամական Հանրապետություն է հռչակվում 1979 թվականի ապրիլի 1-ին՝ համազգային հանրաքվեի արդյունքներով: 1979 թվականի դեկտեմբերին Իրանի Իսլամական Հանրապետությունում հաստատվում է Աստվածապետական Սահմանադրություն, որի համաձայն` իսլամական շիա ուղղությունը հռչակվում է պետական կրոն, ինչպես և պարսկերենը՝ պետական լեզու:
Դրանով իսկ երկրի պետական բարձրագույն իշխանությունը, գերագույն հրամանատարն այլևս հանդիսանում է երկրի հոգևոր առաջնորդը: 1979 թվականից Գերագույն առաջնորդն այաթոլլահ Ռուհոլլա Խոմեյնին էր, իսկ նրա մահից հետո՝ այաթոլլահ Ալի Խամենեին է:
