Ինչպես տեղեկանում ենք ՌԴ Քննչական ծառայության կայքից, այդ գերատեսչությունը պարզել է Մոսկվայի «Դոմոդեդովո» օդանավակայանում ահաբեկչական գործողությունն իրականացրած 20-ամյա մահապարտ-ահաբեկչի ինքնությունը:
Ըստ կայքի` դա իրականացրել է հյուսիսկովկասյան հանրապետություններից մեկի բնակիչը, որի անձը ծառայությունը չի բացահայտում: Ինչպես նաև չի նշվել, թե որ հանրապետությունից է այդ կովկասցին: Հայտնի է, որ արդեն կան ձերբակալվածներ և հետախուզման մեջ գտնվողներ:
Ըստ ծառայության ունեցած փաստերի` այս ահաբեկչությունը կոնկրետ ուղղված է եղել արտասահմանցիների դեմ, այդ իսկ պատճառով պայթյունն իրականացվել է օդանավակայանում:
Հիշեցնենք, որ զոհվածների թվում են Մեծ Բրիտանիայի, Ավստրիայի, Ուկրաինայի, Գերմանիայի, Ուզբեկստանի և Տաջիկստանի քաղաքացիներ: Ահաբեկչության ժամանակ վիրավորվել են Ֆրանսիայի, Նիգերիայի, Մոլդովայի, Իտալիայի, Տաջիկստանի, Գերմանիայի, Սլովակիայի և Սլովենիայի քաղաքացիներ:
Հատուկ քննչական ծառայությունը նաև հերքել է այն տեղեկատվությունը, համաձայն որի` Մոսկվայի հյուրանոցներից մեկում պայթած ահաբեկիչ կինն ու «Դոմոդեդովո» օդանավակայանի ահաբեկիչները կապված են եղել, հայտարարելով, որ այդ լուրը չի համապատասխանում իրականությանը:
«Առաջին լրատվականը» տեղեկացրել էր, որ Մոսկվայում ամանորյա գիշերը ահաբեկչություն իրականացնող մահապարտ կինը պայթել էր իր հյուրանոցային համարում այն պատճառով, որ պատահական շնորհավորական sms հաղորդագրություն էր ստացել օպերատորից այն հեռախոսի վրա, որը պայթուցիկ սարքի մի մասն էր կազմում: