Ֆրանսիայի նախագահական և Հունաստանի խորհրդարանական ընտրությունների արդյունքներից հետո ասիական բորսաներում վերսկսվել է եվրոյի անկումը, և նվազել են ֆոնդային ինդեքսները:
Ինչպես հաղորդում է Reuters-ը, երկուշաբթի առավոտյան Սիդնեյի արժութային շուկայում եվրոյի փոխարժեքն ընկել է և տատանվում է 103-103.5 իենի սահմաններում: Nikkei-ի գործարար ակտիվության ճապոնական ինդեքսը ընկել է 2.6%-ով:
Associated Press-ը տեղեկացնում է, որ նավթի հունիսյան ֆյուչերսների գինը Նյու Յորքում ընկել է մինչև 96.62 դոլար:
Հիշեցնենք. կիրակի Ֆրանսիայում տեղի ունեցած նախագահական ընտրություններում հաղթանակ է տարել սոցիալիստ Ֆրանսուա Օլանդը: Մի շարք ֆինանսական վերլուծաբաններ կարծում են, որ նրա քաղաքականությունը խոշոր կապիտալի նկատմամբ բարենպաստ չի լինի:
Հունաստանի խորհրդարանկան ընտրություններում, վերջին տվյալներով, իշխող կոալիցիային չի հաջողվում մեծամասնություն կազմել խորհրդարանում, ինչը հարցականի տակ է դնում եվրոգոտու կայունությունը:
