Իսպանական մամուլը տեղեկացնում է, որ «Բարսելոնա»-ի գլխավոր մարզիչ Խոսեպ Գվարդիոլան մեկնաբանել է Մադրիդի «Ռեալ»-ի` Իսպանիայի չեմպիոնի տիտղոսի նվաճմանը վերաբերող իր արտահայտությունը:
Հիշեցնենք, որ «կապտանռնագույներ»-ի մարզչի պնդմամբ` «արքայական ակումբ»-ը հաջողության է հասել որոշ իրադարձությունների շուրջ կատալոնացիների ներկայացուցիչների լռության շնորհիվ:
«Ես միշտ համոզված եմ եղել, որ «Ռեալ»-ի նկատմամբ առավելության հասնելու համար անհրաժեշտ է լավ, շատ լավ խաղալ: Սակայն երբեմն անգամ գերազանց հանդես գալու փաստն ազդեցություն չի ունենում:
Ցանկանում եմ նշել` եթե որևէ ակումբ չեմպիոն է դառնում միավորների նման հարաբերակցությամբ, այն արժանի է հարգանքի:
Ինչ վերաբերում է իմ` մի քանի օր առաջ արած արտահայտությանը, ապա ասեմ, որ չեմ զղջում: Կյանքում ես շատ սխալներ եմ թույլ տվել, բայց սա այդ դեպքը չէ»,- հայտնել է Խոսեպ Գվարդիոլան:
