Թուրքական Milliyet թերթի փոխանցմամբ՝ «Էրգենեկոն» ահաբեկչական կազմակերպության գործով կասկածյալ և դասալիք, գեներալ-մայոր Մուսթաֆա Բաքըջըն Թուրքիայից Ռուսաստան է փախել Քրդստանի աշխատավորական կուսակցության (PKK) միջոցով:
Նշվում է, որ PKK-ի օգնությամբ թուրք գեներալն Ուլուդերեի միջոցով հայտնվել է Հյուսիսային Իրաքում, որտեղից էլ մեկնել է Ռուսաստան: Ստամբուլի ծանր հանցագործությունները քննող 13-րդ դատարանը նրա նկատմամբ կայացրել է ձերբակալման դատավճիռ: Նա մեղադրվում է այսպես կոչված «ինտերնետ հուշագրին» մասնակցելու մեջ:
Հիշեցնենք, որ ապրիլի 27-ին լրացավ Թուրքիայի զինված ուժերի գլխավոր շտաբի տարածած հուշագրի 5-րդ տարին: 2007 թվականի ապրիլի 27-ին՝ տեղական ժամանակով ժամը 23.20-ին, գլխավոր շտաբը հրապարակեց մի հուշագիր, որում հաստատվում էր Թուրքիայի Հանրապետության աշխարհիկ ռեժիմի անխախտությունը:
Այդ հուշագիրը նախագահական ընտրությունների ժամանակ ստորագրել է տվյալ ժամանակվա գլխավոր շտաբի պետ Յաշար Բույուքանըթը: Այն ժամանակ բանակը հանդես էր գալիս Աբդուլլահ Գյուլի թեկնածության դեմ: Հուշագրի տեքստը հայտնվել էր ինտերնետում, որից հետո շատ լրագրողներ ու վերլուծաբաններ այն անվանեցին «E-հուշագիր» (էլեկտրոնային հուշագիր):
Հուշագրում ասվում էր, որ Թուրքիայի Հանրապետության նախագահ ու զինված ուժերի գերագույն հրամանատար կարող է լինել այնպիսի մարդ, որը հավատարիմ կգտնվի երկրի աշխարհիկ բնույթին, Աթաթուրքի իդեալներին ու ազգային մտածելակերպին:
