Այսօր մաքսային աշխատողների միջազգային օրն է: Այս օրը նշվում է 1983 թվից: Հունվարի 26-ին ոչ միայն ողջ աշխարհի մաքսային աշխատողների համերաշխության օրն է, այլ նաև հասարակության ուշադրությունը այս շատ կարևոր աշխատանքի վրա հրավիրելու:
Այս օրը ողջ աշխարհում իրենց տոնն են նշում մոտ 800 հազար մաքսային աշխատողներ: Համաշխարհային մաքսային կազմակերպությունը համախմբում է 162 պետություն:
«Առաջին լրատվականը» փորձեց պարզել, թե հայ մաքսային աշխատողներն ինչպե՞ս են նշում իրենց օրը: Մաքսային պետական կոմիտեի տեղեկատվության և հասարակայնության հետ կապերի բաժնից մեզ տեղեկացրին, որ հայ մաքսային աշխատողներն իրենց մասնագիտական տոնը նշում են ոչ թե հունվարի 26-ին, այլ հունվարի 4-ին` մաքսային կոմիտեի ստեղծման օրը, և այսօր ոչ մի տոնական միջոցառում չի պլանավորվում:
Մենք խոսեցինք նաև մաքսային աշխատողներից մեկի հետ, որն ասաց, թե իրենք չգիտեն մաքսավորների միջազգային օրվա մասին և չեն էլ նշում: Իրենք գիտեն միայն հունվարի 4-ի մասին, իսկ հատուկ իրենց համար կազմակերպված խրախուսական նվերներ, միջոցառումներ չեն տեսել:
