Երկու ռուս և երկու բելառուս երկուշաբթի օրը Տրիպոլիում կանգնել են դատարանի առջև՝ լիբիական տապալված նախագահ Մուամար Քադաֆիի զորքերին աջակցելու մեղադրանքով։ Այս մասին երկուշաբթի օրը հաղորդել է France Press-ը՝ հղում անելով լիբիական գնդապետ Ալի ալ-Չեյկին:
Ալ-Չեյկիի խոսքերով՝ ռուսների և բելառուսների դեմ հարուցված է նույն գործը, ինչ որ սեպտեմբերին հարուցվել էր Ուկրաինայի 20 քաղաքացիների դեմ։
«Նրանք մեղադրվում են «երկիր-օդ» տիպի հրթիռների թողարկման նախապատրաստման մեջ, որի նշանակետն էին ՆԱՏՕ–ի ինքնաթիռները, որոնք պաշտպանում են խաղաղ բնակչությանը»,- FRANCE PRESS գործակալությանը հայտնել է գնդապետ Ալ-Չեյկին:
Նա հավելել է, որ ռուսական, ուկրաինական և բելառուսական քաղաքացիները մեղադրվում են Մուամար Քադաֆիի վարչակարգի կողմից ժողովրդական ապստամբությունների ճնշմանը և խաղաղ բնակիչների վրա հարձակմանն աջակցելու մեջ:
Գնդապետ Ալ-Չեյկին ավելացրել է, որ բոլոր ամբաստանյալները ժամանել էին Լիբիա անձնական նախաձեռնությամբ: Նրա կարծիքով՝ Ռուսաստանի, Բելառուսի և Ուկրաինայի իշխանություններն իրենց քաղաքացիների վրա ճնշումներ չեն գործադրել:
Լիբիայում Ազգային անցումային խորհրդի ստորաբաժանումն անցած տարվա սեպտեմբերի սկզբին ձերբակալել է 22 ուկրաինացի մասնագետի, ովքեր աշխատում էին լիբիական նավթային օբյեկտներում: Նրանց մեղադրել են այն բանում, որ իբր նրանք Քադաֆիի զինվորների կողմից մասնակցել են ռազմական գործողություններին: Ավելի քան վեց ամիս ուկրաինացիները հյուսիսաֆրիկյան երկրում գտնվում են տնային կալանքի տակ:
