Եվրոպայի առաջնության մեկնարկից երկու ամիս առաջ սպորտային լրատվամիջոցները փորձում են վերլուծել մրցաշարի ընթացքը և հնարավորինս ճշգրիտ «նախագուշակություններ» անել:
Ըստ հանրահայտ Soccerlens կայքի` տանտերերը` Լեհաստանը և Ուկրաինան, դուրս չեն գա իրենց խմբերից, իսկ միակ թիմը, որը կարող է հաղթել աշխարհի ու Եվրոպայի գործող չեմպիոններին, բունդեսթիմն է:
Կայքի վերլուծության համաձայն` A խմբի հաղթողը կլինի Հունաստանը, իսկ ռուսները կգրավեն 2-րդ հորիզոնականը: B խումբը «մահվան խումբ» է, և այստեղ, հավանաբար, հաղթող կլինի Գերմանիայի ազգային հավաքականը, նրան կհաջորդեն հոլանդացիները: C խմբում, անկասկած, առաջատար կլինի Իսպանիայի «աստղային» հավաքականը, 2-րդ հորիզոնականը կզբաղեցնի Խորվաթիայի հավաքականը: D խմբում կայքի վերլուծաբանները առաջատար են համարում Ֆրանսիայի և Անգլիայի ազգային հավաքականներին` այնուամենայնիվ առավելություն տալով Բլանի սաներին:
Քառորդ եզրափակիչներում Հոլանդիան պարտության կմատնի հույներին, Իսպանիան` անգլիացիներին, բունդեսթիմը` ռուսներին, իսկ Խորվաթիա–Ֆրանսիա զույգում հաղթող դուրս կգան «վանդակավորներ»-ը:
Կիսաեզրափակիչում Իսպանիայի ազգային հավաքականը կմրցակցի Հոլանդիայի դեմ: Կայքի վերլուծաբանները ենթադրում են, որ այդ գրավիչ ու հետաքրքիր դիմակայության հաղթողը կլինեն իսպանացիները: Գերմանացիներն էլ պարտության կմատնեն խորվաթներին:
Իսպանիան ընդդեմ Գերմանիայի. ահա թե ինչ է մեզ սպասում Եվրոպայի առաջնության եզրափակիչում: Դել Բոսկեի սաները գերազանց մարզավիճակում են, սակայն բունդեսթիմի ֆուտբոլիստների փորձի ու երիտասարդ տարիքի միակցությունը հաղթանակ կբերի նրանց:
«Ոսկե խաղակոշիկ»-ի հավակնորդներ կլինեն գերմանացի Մարիո Գոմեսն ու հոլանդացիներ Ռոբին վան Պերսին, Կլաաս-Յան Հունթելարը:
