Երևանի թիվ 4 ընտրատարածքում պատգամավորության թեկնածու առաջադրված «168 ժամ» թերթի խմբագիր Սաթիկ Սեյրանյանը փաստում է, որ նախընտրական քարոզարշավը չսկսած՝ իր հետ նույն ընտրատարածքում ՀՀԿ կողմից առաջադրված Արտակ Սարգսյանը (ՍԱՍ-ի Արտակ) ընտրակաշառք է բաժանում: Այս մասին նա ասաց «Առաջին լրատվական»-ի հետ զրույցում՝ ավելացնելով, որ առավել կոնկրետ հրապարակումներով ինքը հանդես կգա մոտ ժամանակներս:
«Օրերս պատրաստվում եմ տալ այն մարդկանց անունները, թե ում միջոցով, որտեղ և որքան ընտրակաշառք է տրվում: Իհարկե, ընտրակաշառք բաժանողները չարաչար սխալվում են, եթե իրենց թվում է՝ 15 հազար դրամ ընտրակաշառքը կամ ՍԱՍ սուպերմարկետներում տրվող 15 տոկոս բոնուսներն աշխատելու են: Բացի այդ, մենք մի խումբ ունենք, որն այս պահի դրությամբ ընտրացուցակներն է ստուգում: Արդեն իսկ հայտնաբերված փաստեր կան, որ տարիներ շարունակ Հայաստանից բացակայող որոշ բնակարանների սեփականատերերի փոխարեն այդ նույն բնակարաններում այլ մարդիկ են գրանցված: Մամուլից տեղեկացա, որ ՍԱՍ-ի աշխատակիցներին կրկնակի անձնագրեր են տրվում: Այնպիսի տպավորություն է, որ այնտեղի աշխատողները ստրուկներ են, որոնց սեփականատերը շահագործում է»,- ասաց Սաթիկ Սեյրանյանը:
Ամփոփելով՝ պատգամավորության թեկնածուն ընդգծեց, որ իր հանրապետական մրցակիցը՝ Արտակ Սարգսյանը, «պատգամավորի բարդույթ» ունի: «Նա իր մեքենայի վրա կրում է ԱԺ մեկ այլ պատգամավորի պետհամարանիշերը: Սարգսյանը խնդիր է դրել, որ ինչ գնով էլ լինի պատգամավոր դառնա, բայց ընտրողը մերժելու է նրան»: