Հակակարկտային կայանների տեղակայման աշխատանքներում թույլ է տրվել 15 մլն 558 հազ. դրամի ծավալային հավելագրում (2009 թ.՝ 5 մլն 590 հազ. դրամ և 2010 թ.` 9 մլն 968 հազ. դրամ): ԱԺ վերահսկիչ պալատի՝ ՀՀ գյուղատնտեսության նախարարությանը պետական բյուջեից հատկացված միջոցների օգտագործման նկատմամբ իրականացված վերահսկողության արդյունքների համաձայն, գերատեսչությունը շինարարական և վերանորոգման աշխատանքներում թույլ է տվել 1 մլն 794 հազ. դրամի հավելագրում:
2011 թ. «Սերմերի գործակալություն» ՊՈԱԿ-ի կողմից գարնանացան գարու սերմացու տեղափոխող վարորդներին փաստացի կատարած աշխատանքներից ավելի է վճարվել 280.5 հազ. դրամ, իսկ 2010 թ. ՌԴ-ից ներկրված աշնանացան ցորենի պահեստավորման համար վարձակալած տարածքի համար վճարվել է պայմանագրով նախատեսված գումարից ավելի 500 հազ. դրամ: Ցորենի բեռնաթափման, սերմացուն մարզկենտրոններ տեղափոխելու ծառայությունների դիմաց պայմանագրային գներից ավելի է վճարվել 2.8 մլն դրամ:
Բուժականի տարածաշրջանում անտառապատված տարածքներից 18 հա-ում սերմնաբուսակներ ընդհանրապես չկան, հետևաբար, այդ աշխատանքների համար վճարված 9.5 մլն դրամը ենթակա է պետական բյուջե հետ վերադարձման:
Անտառավերականգնման աշխատանքների կատարողականներով ավելի է վճարվել սերմնաբուսակի և խոշոր տնկիների հանման և տնկման աշխատանքներ՝ գումարով 378.1 հազ. դրամ:
ՎՊ-ն գյուղնախարարությանն առաջարկել է բյուջե վերադարձնել ավելի ծախսագրված այս գումարները:
