Ադրբեջանական Trend լրատվական գործակալության փոխանցմամբ՝ Ադրբեջանը մտադիր է արդյունահանվող գազի ծավալը հասցնել տարեկան մինչև 30-40 միլիարդ խորանարդ մետրի: Այս մասին այսօր Բաքվում մեկնարկած Եվրանեսթի Խորհրդարանական վեհաժողովում հայտարարել է Ադրբեջանի էներգետիկայի և արդյունաբերության նախարար Նատիգ Ալիևը:
Վերջինիս խոսքերով՝ նավթային ոլորտում իրենք մտադրվել են ապահովել երկրում օրական մեկ միլիոն բարել նավթի արդյունահանումը. «Էներգետիկ նախագծերի իրագործումն Ադրբեջանին հնարավորություն է ընձեռել ավելացնելու ածխաջրածինների արդյունահանումը: 1994-2010 թվականներին Ադրբեջանն այդ նպատակով ծախսել է 35 միլիարդ դոլար»:
Նշվում է, որ Ադրբեջանի պետական վիճակագրական կոմիտեի տվյալներով՝ 2011 թվականին Ադրբեջանում արդյունահանվել է 45.37 միլիոն տոննա նավթ և կոնդենսատ, ինչը 10.5 տոկոսով պակաս է՝ համեմատած 2010 թվականի հետ։ Միևնույն ժամանակ, նախորդ տարի Ադրբեջանում գազի արդյունահանումը կազմել է մոտ 26 միլիարդ խորանարդ մետր, ինչը 2.2 տոկոսով պակաս է 2010 թվականի համեմատ:
