Անցյալ տարվա դեկտեմբերի սկզբներին Երևանի քաղաքապետ Գագիկ Բեգլարյանը ՀՀ նախագահի նստավայրից առևանգել էր Սերժ Սարգսյանի արարողակարգի վարչության աշխատակից Արամ Կանդայանին, տարել իրեն պատկանող «Մետաքս» գործարան և ծեծի ենթարկել: Ծեծի մանրամասները հրապարակվեցին մամուլում, որից հետո Գագիկ Բեգլարյանը հրաժարական տվեց Երևանի քաղաքապետի պաշտոնից: Նրա արարքը դատապարտում էին անգամ իր կուսակից ՀՀԿ-ական պատգամավորները: Խոսակցություններ էին շրջանառվում, որ Սերժ Սարգսյանի մտերիմ, ՀՀ նախագահի և Երևանի ավագանու ընտրությունների ժամանակ անձամբ նրան «արջի ծառայություններ» մատուցած Երևանի նախկին քաղաքապետի դեմ քրեական գործ է հարուցվելու: Շաբաթ օրը կայացած մամլո ասուլիսի ժամանակ, սակայն, ՀՀԿ փոխնախագահ Ռազմիկ Զոհրաբյանը հայտարարեց, որ Գագիկ Բեգլարյանի դեմ քրեական գործ չի հարուցվելու, իրենց կուսակցությունում նման տրամադրություններ չկան, և դրանք ընդամենը խոսակցություններ են: «Առաջին լրատվականը» փորձեց Սերժ Սարգսյանի արարողակարգի վարչությունից տեղեկանալ, թե Արամ Կանդայանը շարունակո՞ւմ է աշխատել իր նախկին պաշտոնում, թե՞ ոչ: «Բայց ի՞նչ պրոբլեմ պետք է լինի, մարդը ո՞նց աշխատում էր, շարունակում է աշխատել»,- մեր հարցին հարցով արձագանքեց արարողակարգի վարչության աշխատակցուհին: Իսկ Արամ Կանդայանին գտնելու և նրանից մանրամասներ իմանալու համար նա խորհուրդ տվեց դիմել Սերժ Սարգսյանի լրատվության և հասարակայնության հետ կապերի վարչություն: Լրատվության և հասարակայնության հետ կապերի վարչության աշխատակցուհին էլ տեղեկացրեց, որ Արամ Կանդայանը շարունակում է նախկինի պես աշխատել, այժմ բացակայում է քաղաքից, կվերադառնա միայն հունվարի 20-ին, որից հետո էլ մենք կարող ենք հարցերն ուղարկել գրավոր և նրանից ստանալ պատասխանը: