Պակիստանի խորհրդարանական հանձնաժողովը ԱՄՆ-ի հետ հարաբերությունները շարունակելու համար պայման է դրել դադարեցնել ամերիկյան անօդաչու սարքերից հարվածները,- հաղորդում է Associated Press-ը:
Հանձնաժողովի պահանջները խորհրդարանում սկսել են քննարկվել մարտի 20-ի առավոտյան: Կարծիք է արտահայտվել, որ անօդաչու սարքերի օգտագործման սահմանափակումը կարող է ավելի բարդացնել երկու երկրների միջև հարաբերությունները: Այնուամենայնիվ, խորհրդարանի խոսնակը հանձնաժողովի հայտարարությանն ավելացրել է, որ Իսլամաբադը պետք է Վաշինգտոնից պահանջի ներողություն խնդրել 2011 թ. նոյեմբերին 24 պակիստանցի զինվորների սպանության համար:
CNN հեռուստաալիքին հանձնաժողովի նախագահ Հիադեր Աբաս Ռիզվին հայտնել է, որ ինքն ու իր գործընկերներն առաջնորդվել են ինչպես Պակիստանի ներքին, այնպես էլ միջազգային հանրության պահանջով: Նա հույս է հայտնել, որ հանձնաժողովի խորհուրդները մանրամասն քննարկվելուց հետո կընդունվեն խորհրդարանում:
Հիշեցնենք. ԱՄՆ-ի և Պակիստանի միջև հարաբերությունները սրվեցին այն բանից հետո, երբ 2011 թ. մայիսին ամերիկյան հատուկ ջոկատայինները, առանց Պակիստանի իշխանություններին տեղեկացնելու, նրա տարածքում հատուկ գործողություն իրականացրին և չեզոքացրին «թիվ մեկ ահաբեկիչ» Ուսամա բեն Լադենին: Նրանց միջև հարաբերություններն ավելի բարդացան, երբ 2011 թ. նոյեմբերին ՆԱՏՕ-ի զորքերի օդային հարվածի հետևանքով զոհվեց պակիստանցի 24 զինծառայող:
ԱՄՆ օդուժը պարբերաբար անօդաչու թռչող սարքեր է օգտագործում պակիստանա-աֆղանական սահմանի վրա զինյալների բազաները ոչնչացնելու համար:
