Երեկ մեկնարկած Գերմանիայի առաջնության երկրորդ խաղաշրջանի առաջին իսկ հանդիպումը կարելի է համարել ոչ միայն տուրի, այլև ամբողջ առաջնության կենտրոնական հանդիպումներից մեկը: Մրցաշարային աղյուսակի երրորդ տեղում ընթացող Լևերկուզենի «Բայեր»-ն ընդունել էր առաջատար Դորտմունդի «Բորուսիա»-ին: Խաղի կարևորությունն իսկապես շատ մեծ էր, հատկապես` դորտմունդցիների համար: Հաղթանակի դեպքում ոչ միայն կբարձրանար Կլոպի և իր սաների տրամադրությունը, այլև կշարունակվեր աննախադեպ հաղթարշավը: Պարտության դեպքում նրանք արդեն հասանելի կթվային հետապնդողներին և որոշակի խնդիրներ կունենային:
Առաջին խաղակեսն անցավ հավասար պայքարում, չնայած արդեն երկրորդ րոպեին Սվեն Բենդերը Շահինի փոխանցումից հետո հարվածեց դարպասաձողին: «Բայեր»-ի գրոհները փոքր-ինչ հախուռն էին, բայց Կիսլինգն առջևում անընդհատ անհանգստացնում էր մրցակցի պաշտպաններին ու դարպասապահին: Այդուհանդերձ, 0:0 հաշիվն առաջին խաղակեսի պատկերի ճիշտ արտացոլումն էր:
Երկրորդ խաղակեսը մեկնարկեց «Բորուսիա»-ի բուռն գրոհների ներքո: «Բայեր»-ի տապալումը սկսվեց 50-րդ րոպեից. 6 րոպեի ընթացքում «Բորուսիա»-ն երեք գնդակ ուղարկեց Բունդեսլիգայի լավագույն դարպասապահներից մեկի` Ռենե Ադլերի դարպասը: 50-րդ և 53-րդ րոպեներին Կևին Գրոսկրոյցը դարձավ դուբլի հեղինակ, երեք րոպե անց Մարիո Գյոթցեն հաշիվը դարձրեց 0:3: Յուպպ Հայնկիսի սաներին հաջողվեց ընդամենը մեկ պատասխան գնդակ խփել. 80-րդ րոպեին աչքի ընկավ Կիսլինգը:
«Բայեր»-«Բորուսիա»` 1:3. Դուրտմունդի հաղթարշավը շարունակվում է:
