Reuters գործակալության փոխանցմամբ՝ ՄԱԿ-ի մարդու իրավունքների հանձնաժողովի հատուկ զեկուցող, Մալդիվյան կղզիների նախկին արտգործնախարար Ահմեդ Շահիդը հայտարարել է, որ նախորդ տարի Իրանում մահապատժի է ենթարկվել մոտ 670 մարդ:
Նրանց մեծ մասը մահապատժի է դատապարտվել թմրանյութերի հետ գործ ունենալու պատճառով, իսկ ավելի քան 20-ը՝ իսլամի դեմ հանցանքներ գործելու համար: Շահինի տվյալներով՝ մինչև նախորդ տարվա կեսերն Իրանում մահապատժի է ենթարկվել 200 մարդ, իսկ սեպտեմբերից մինչև տարեվերջ այդ ցուցանիշը հասցվել է 600-ի:
Պաշտոնապես հայտարարվել է այդ մահապատիժներից միայն 421-ի մասին, սակայն դրա հետ մեկտեղ գաղտնի պայմաններում իրականացվել է ևս 249 մահապատիժ: Շահիդն ընդգծել է, որ Իրանը կոպտորեն խախտում է ՄԱԿ-ի՝ Մարդու իրավունքների մասին համաձայնագրերը:
Հիշեցնենք, որ նախորդ տարվա դեկտեմբերի կեսերին Amnesty International միջազգային իրավապաշտպան կազմակերպությունը հրապարակել էր Իրանում թմրանյութերի տարածման կապակցությամբ սահմանվող և իրականացվող մահապատիժների վերաբերյալ իր զեկույցը։ Զեկույցում նշված էր, որ 2011 թվականին Իրանում մահապատժի է ենթարկվել 480 մարդ, իսկ 2010 թվականին՝ 172։
