Մարտի 12–ից Հայաստանում կսկսվեն կուսակցությունների ու դաշինքների համամասնական և 41 ընտրատարածքներում մեծամասնական ընտրակարգով առաջադրումները:
Առաջադրումների վերջին ժամկետը մարտի 22-ի ժամը 18:00-ն է, ինչից հետո սկսվում են թեկնածուների գրանցման, իսկ ապրիլի 8-ից` պաշտոնական քարոզարշավի փուլերը:
Ազգային ժողովի համամասնական ընտրակարգով պատգամավորի թեկնածուներ առաջադրելու համար ԿԸՀ պետք է ներկայացվի մասնակցության դիմում, որը պետք է լինի ստորագրված և կնքված կուսակցության ղեկավարի կողմից:
Կուսակցությունների դաշինքներն Ազգային ժողովի համամասնական ընտրակարգով ընտրություններին մասնակցելու դիմումը ներկայացնում են դաշինքի անդամ կուսակցությունների մշտապես գործող մարմինների որոշումների հիման վրա` ստորագրված և և կնքված դաշինքի անդամ կուսակցությունների ղեկավարների կողմից:
Ազգային ժողովի մեծամասնական ընտրակարգով պատգամավորի թեկնածու առաջադրելու իրավունք ունեն կուսակցությունները և քաղաքացիները` ինքնաառաջադրման սկզբունքով:
Կուսակցությունը յուրաքանչյուր ընտրատարածքում իրավունքունի առաջադրելու պատգամավորի մեկ թեկնածու: Կուսակցությունը կարող է պատգամավորի թեկնածու առաջադրել նաև իր կուսակցության անդամ չհանդիսացող անձի:
