Ամեն տարի Ֆրանսիա են այցելում միլիոնավոր զբոսաշրջիկներ, ընդ որում՝ վերջիններս այցելում են ոչ միայն Փարիզ ու Լազուրե ափ, զբոսաշրջիկների շրջանում սկսել են մեծ հետաքրքրություն առաջացնել երկրի սուրբ վայրերը:
«Հոգևոր տուրիզմի» նկատմամբ ֆրանսիական հողում այնքան մեծ է հետաքրքրությունը, որ սկսում են առաջանալ ուխտագնացության նորանոր վայրեր: Այս մասին երեկ Ֆրանսիայի եպիսկոպոսների ժողովում հայտարարել է «Ֆրանսիայի սրբազան վայրերը» ասոցիացիայի նախագահ Ժերալդին Բալոն: «Մեր ժամանակակիցները, ինչպիսին էլ լինի նրանց վերաբերմունքը կրոնի հանդեպ, երբեմն դադարի կարիք են զգում` ցանկանալով մի պահ մոռանալ սպառողի հոգեբանության մասին, վերադառնալ ակունքներին, դիմել մարդկանց ու այն վայրերի օգնությանը, որոնց մեջ արտահայտվում է գոյության իմաստը»,- ասել է նա:
Եվրոպայում այսօրվա դրությամբ ուխտագնացության ամենահայտնի վայրերից է Սուրբ Հակոբի ուղին, որն սկսվում է Իսպանիայում ու ավարտվում Ֆրանսիայում:
ՄԱԿ-ի Համաշխարհային զբոսաշրջային կազմակերպության տվյալներով` յուրաքանչյուր տարի Ֆրանսիա այցելած 90 մլն զբոսաշրջիկներից 20 մլն-ը ուղևորություն են կատարում` ելնելով կրոնական և հոգևոր հանգստության նկատառումներից:
Վերջին տարիներին փոխվել է Ֆրանսիայի սուրբ վայրեր այցելած ուխտավորների կազմը` ավելի շատ այցելում են բրիտանահպատակ քաղաքացիներ, գերմանացիներ: Բավականաչափ թով զբոսաշրջիկներ են ժամանում Չինաստանից, Հարավային Կորեայից ու նախկին ԽՍՀՄ երկրներից:
Ֆրանսիայում ուխտավորներն այցելում են Լուրդ քաղաք, Մոն Սեն Միշել կղզի, Շարտր քաղաք, նորմանդական Լիզյո:
