Բրյուսելն ու Կիևը համագործակցության հարցում փակուղի են մտել, քանի որ համապատասխան համաձայնագրի ստորագրումն ու վավերացումը «փաստորեն արգելափակվել է Ուկրաինայի գործողությունների հետևանքով»: Այս մասին, ինչպես հաղորդում է NEWSru.Ua-ն, ասվում է Շվեդիայի, Մեծ Բրիտանիայի, Չեխիայի, Լեհաստանի և Գերմանիայի ԱԳ նախարարների համատեղ հոդվածում, որը «Ուկրաինայի սողալը» վերնագրով հրապարակվել է The New York Times թերթում:
Հոդվածը գրվել է Բրյուսելի և Կիևի միջև բանակցություների 5-ամյա տարելիցի կապակցությամբ:
«Ժողովրդավարությունը, մարդու իրավունքները և օրենքի գերակայությունն այն արժեքներն են, որոնք ընկած են ասոցիացիայի մասին Համաձայնագրի հիմքում, և Ուկրաինան, դրանց հետ կապված, արդեն իսկ իր վրա է վերցրել պարտավորություններ՝ ԵԱՀԿ-ի, ԵԽ-ի և ԵՄ–ի առջև»,-նշված է հոդվածում:
Եվրոպական արտաքին քաղաքականության գերատեսչությունների ղեկավարներն ընդգծել են, որ չեն կարող թաքցնել «Ուկրաինայի ժողովրդավարության իրավիճակի մասին աճող անհանգստությունը»:
Նրանք մասնավորապես նշում են, որ Ուկրաինայի անկախ ԶԼՄ-ները և հասարակական կազմակերպությունները հաղորդում են իշխանության կողմից իրականացվող ճնշումների մասին: Իսկ ընդդիմության ներկայացուցիչների, այդ թվում՝ Յուլյա Տիմոշենկոյի և Յուրի Լուցենկոյի դատական գործընթացները «քաղաքական շարժառիթների և ընտրողական արդարադատության նշաններ ունեն»:
Հոդվածում հատուկ ուշադրություն է դարձվում Ուկրաինայում այս տարվա հոկտեմբերին կայանալիք խորհրդարանական ընտրություններին:
