Քիչ առաջ Հայաստանի քաղաքագետների միությունում սկսվեց քննարկում՝ POLITLOGOS իրավիճակային վերլուծությունների ու քաղաքական կանխատեսումների ակումբի և հակահամակարգային ընդդիմության` «Սարդարապատ» շարժման նախաձեռնող խմբի անդամների մասնակցությամբ:
Այս քննարկումը Քաղաքագետների միությունում 6-րդն է, որի ընթացքում պետք է ներկայացվեն «Սարդարապատ» շարժման՝ այլընտրանքային իշխանություն ձևավորելու և գալիք ընտրություններին չմասնակցելու հորդորների հիմքերը:
«Մենք գիտենք, որ հակահամակարգային ընդդիմությունը մեծ հույսեր չի տածում ընտրությունների նկատմամբ: Սակայն կեղծիքներից խուսափելու ամենաարդյունավետ միջոցը ակտիվ մասնակցությունն է ընտրություններին: Հակահամակարգային ընդդիմությունը հիմքեր ունի կասկածելու գալիք ընտրությունների արդարությանը: Լևոն Տեր-Պետրոսյանը ինստիտուցիոնալ ընդդիմություն է, իսկ «Սարդարապատ»-ը այն մարդկանցով է ներկայացված, ովքեր երբևէ չեն եղել իշխանության մեջ, այդ իսկ պատճառով նրանց դիրքորոշումը տրամաբանական է. նրանք տարիների ընթացքում քննադատաբար են վերաբերվել վարչակազմին»,- ներկայացրեց Քաղաքագետների միության նախագահ Հմայակ Հովհաննիսյանը:
«Սարդարապատ» շարժման նախաձեռնող խմբի անդամ Գարեգին Չուգասզյանը հանդես եկավ հարցադրմամբ. «Արդյոք այն, ինչը կոչվում է ընտրություն, կբացի՞ հեռանկար մեր երկրի առջև: Եթե դիտարկենք վերջին 15 տարվա ընտրությունները, ապա ասել, որ նոր ընտրությունները հեռանկարներ կբացեն երկրի առջև՝ առնվազն անիմաստ է: Չկա այդպիսի հեռանկար: Բոլոր հեռանկարները գնալով նեղանում են, և ավելի են գծագրվում մեր երկրի քաղաքական և տնտեսական վտանգները. մեր երկիրը համակարգային ճգնաժամի մեջ է մտնում, մեր ազգային նավը դեգերում է առանց որևէ նպատակի: Երկիրը չգիտի, թե ուր է գնում, այդ պատճառով պետք է հայաստանակենտրոն հայացք ունենանք: Առաջիկա կեղծ ընտրություններին մասնակցելու և չմասնակցելու հարցն անիմաստ է»: Ըստ նրա՝ ճանապարհը այլընտրանքային իշխանության սաղմերի ձևավորումն է, այլընտրանքային հարթակ՝ ընդդիմության ձևավորման համար:
«Սարդարապատ» շարժման անդամ Ժիրայր Սեֆիլյանի համոզմամբ՝ քաղաքագիտական դասական լուծումներ գտնել մերօրյա ճահճում և խոսել ընտրությունների մասին մի երկրում, որտեղ քաղաքական դաշտը կայացած չէ՝ անիմաստ է:
«Համարում ենք, որ բանալին հայաստանակենտրոն քաղաքականության մեջ է: Եթե չկարողանանք ստեղծել այդպիսի պետություն, մենք ենթակա ենք սնանկացման և լուծարման: Ուզում եմ ասել, որ ժամանակն է որակական, արժեքային և տարիքային սերնդափոխության: Ո՞վ է խանգարում մեզ, ապօրինի իշխանությանը զուգահեռ, ձևավորել օրինական իշխանություն»,- ասաց Ժ. Սեֆիլյանը՝ հավելելով, որ այսօրվա քաղաքական դաշտը և ընդդիմադիր կոչեցյալ ուժերը ենթարկվում են մի մարդու, որի անունն է Սերժ Սարգսյան:
