Եվրամիության երկրները Բրյուսելում ստորագրել են Բյուջետային պակտը,- հաղորդում է BBC-ն:
Փաստաթղթի տակ իրենց ստորագրությունն են թողել ԵՄ 25 անդամ երկրների ներկայացուցիչներ: Բրիտանիան և Չեխիան պակտը չեն ստորագրել՝ զգուշանալով, որ դրանով Եվրահանձնաժողովը «լայն լիազորություններ» է ստանում՝ միջամտելու իրենց ներքին տնտեսական քաղաքականությանը:
«Նոր Բյուջետային պակտը ընդունվում է ինտեգրացիայի խորացման համար և նպատակ ունի ստեղծել նոր աշխատատեղեր, բարձրացնել տնտեսական աճը Եվրոպայում»,- հայտարարել է Եվրամիության խորհրդի նախագահ Հերման վան Ռոմպեյը:
Գերմանիայի և Ֆրանսիայի կողմից մշակված Բյուջետային պակտը նպատակ ունի նոր և հուսալի հիմք դնել եվրոգոտու ֆինանսական և բանկային շուկաայում ու Եվրամիությունում ընդհանուր առմամբ: Այն նախատեսում է եվրոգոտու անդամ երկրների ֆինանսական քաղաքականության խիստ սահմանափակում: Պայմանագրի մշակողների կարծիքով՝ դրա շնորհիվ ապագայում կբացառվի ԵՄ-ում նման պարտքային ճգնաժամի կրկնությունը:
Մեծ Բրիտանիայի վարչապետ Դևիդ Քեմերոնը հիասթափություն է հայտնել առ այն, որ պայմանագրում հաշվի չեն առնվել իր նկատառումները, մասնավորապես՝ կապված ԵՄ չափազանց բյուրոկրատացված բնույթի վերաբերյալ:
Գերմանիայի կանցլեր Անգելա Մերկելը հայտարարել է, որ պակտի ընդունումը մեկ քայլ առաջ էր Եվրոպայում քաղաքական միասնականությունը և կայունությունը վերականգնելու ճանապարհին:
