«Արտակարգ իրավիճակի» մասին օրինագիծը հատուկ է բերվել ասպարեզ, որպեսզի վաղը-մյուս օրը մայրաքաղաք զորք մտցնելիս իշխանություններն ասեն` իրենց գործողություններն օրինական են, և զինվորական հեղաշրջում չի իրականացվում: Այսօր կայացած մամուլի ասուլիսի ժամանակ այս մասին ասաց ՀԱԿ անդամ Գուրգեն Եղիազարյանը:
«Այս օրենքն ամենաշատը Սերժ Սարգսյանին է պետք. նա գիտի` վաղն ինչ վատ է լինելու»,- ասաց նա:
Ասուլիսի մյուս բանախոս, ՀՀԿ-ական պատգամավոր Լեռնիկ Ալեքսանյանն իր հերթին նշեց, որ այս օրինագիծը միայն ցուցարարների դեմ չէ, այլ ընդհանրապես լարված իրավիճակներում կարգուկանոն սահմանելու համար:
«Ուղղակի պետք է, որ մարդիկ վստահեն իշխանություններին, այդ դեպքում ամեն ինչ ավելի լավ կլինի: Միաժամանակ, եթե կա քիչ թե շատ վստահելի ուժ, դա ՀՀԿ-ն է»,- ասաց նա:
Լրագրողներից մեկի հարցին` առարկայական ի՞նչ հիմքեր կան պնդելու, որ առաջիկա ԱԺ ընտրություններն առավել թափանցիկ ու արդար են անցկացվելու, ՀՀԿ-ական պատգամավորը պատասխանեց.
«Եթե մի բանում հավատացած չեմ, չեմ բարձրաձայնում: Իսկ հիմա հավատում եմ և տեսնում եմ, որ ՀՀ նախագահը փոփոխությունների գնալու կամք ունի: Դա իմիտացիա չէ, նա ուզում է փոխել իրավիճակը, և ես չեմ տեսնում ավելի լավին, փորձառուին, ով կարող է նման քայլ անել: Կամքի ուժ է պետք` խնդիրները հատիկ-հատիկ լուծելու համար, իսկ նախագահի կողքին կա մի կայուն ուժ` ՀՀԿ-ն, որը օգնում է նրան:
Ճիշտ է, հնարավոր է, որ այսօր ՀՀԿ-ն որոշ պատեհապաշտներով է համալրվել, բայց անպայման կմաքրվի նրանցից»,- ընդգծեց Լեռնիկ Ալեքսանյանը:
