Թուրքական Cumhuriyet թերթի փոխանցմամբ՝ ԱՄՆ Կոնգրեսի հետազոտական կենտրոնը պատրաստել է «Թուրքիա. հետին պլան և հարաբերությունները ԱՄՆ-ի հետ» խորագրով 46 էջանոց զեկույց, որում նշված է, որ Թուրքիայում առկա են 5 առանցքային խաղացողներ:
Դրանք են իշխող «Արդարություն և զարգացում» կուսակցությունը (ԱԶԿ) ներկայացնող նախագահ Աբդուլլահ Գյուլը, վարչապետ և ԱԶԿ նախագահ Ռեջեփ Էրդողանը, արտգործնախարար Ահմեդ Դավութօղլուն, թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն, ինչպես նաև Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) հիմնադիր, 1999 թվականից Մարմարա ծովի Իմրալը կղզում ցմահ ազատազրկում կրող քուրդ առաջնորդ Աբդուլլահ Օջալանը:
Բացի այդ, զեկույցում նշված է, որ Թուրքիայի բնակչության 15-20 տոկոսը քրդեր են: Նշվում է, որ Թուրքիայում առկա են նաև 10-20 միլիոն ալևիներ, որոնք հանդիսանում են պետության աշխարհիկ ռեժիմի ամենամեծ աջակիցները (Էրդողանի ռեժիմի հակառակորդները):
Զեկույցը կազմել է մերձավորարևելյան հարցերով փորձագետ Ջիմ Զանոտին:
