Ամերիկացի զինվորների կողմից Ղուրանի օրինակներն այրելու դեմ Աֆղանստանում սկսված ցույցերի հազարավոր մասնակիցներ շրջափակել են Աֆղանստանի Կունդզուր քաղաքում ՄԱԿ-ի գրասենյակի շենքը: Այս մասին հաղորդում է Reuters գործակալությունը:
«Ցուցարարների և ոստիկանության միջև բախումներ են տեղի ունենում: Ակցիայի մասնակիցները փորձում են մտնել համալիրի տարածք, սակայն ոստիկանությունը արգելում է»,- մեջբերում է գործակալությունը ոստիկանության ներկայացուցչին: Հաղորդվում է, որ ոստիկանությունը կրակ է բացել ցուցարարների վրա, ինչի հետևանքով զոհվել է 3, վիրավորվել 46 մարդ:
Աֆղանստանում ցույցերը շարունակվում են արդեն հինգերորդ օրը: Հազարավոր մարդիկ վանկարկում են «Մահ Ամերիկային» և պահանջում են դուրս բերել ամերիկյան զորքերը Աֆղանստանից:
Հիշեցնենք. շաբաթվա սկզբին տեղեկություն տարածվեց, որ Աֆղանստանի Բահրամ քաղաքի ամերիկյան ռազմաբազայում այրել են Ղուրանի մի քանի օրինակներ և իսլամական այլ սուրբ գրքեր: Դրանից հետո Աֆղանստանում բռնկվեցին զանգվածային անկարգություններ: Մասնավորապես հաղորդվում էր, որ Քաբուլում օտարերկրացիների հյուրանոց են հրդեհել:
ՆԱՏՕ-ի ղեկավարությունն ու Պենտագոնի ղեկավար Լեոն Պանետան արդեն ներողություն են խնդրել Աֆղանստանի ժողովրդից և իշխանություններից ամերիկացի զինվորների գործողությունների համար: Երեկ ամերիկացի զինվորների գործողությունների համար ներողություն խնդրեց նաև ԱՄՆ նախագահ Բարաք Օբաման:
