1938թ. այս օրը Լենինականում ծնվեց արվեստի վաստակավոր գործիչ, վավերագրական կինոյի ճանաչված վարպետ Արտավազդ (Արթուր) Փելեշյանը:
1964թ. նա Հայաստանի վավերագրական ֆիլմերի ստուդիայում նկարահանեց առաջին ֆիլմը` «Լեռնային պարեկը»։
Այնուհետև «Հայֆիլմ» կինոստուդիայում և «Երևան» ստուդիայում նկարահանեց «Մարդկանց երկիրը» (1966թ.), «Սկիզբը» (1967թ.), «Երկրաբնակները» (1970թ.), «Մենք» (1969թ.), «Տարվա եղանակները» (1975թ.), «Մեր դարը» (1982թ.), «Վերջ» (1992թ.) ֆիլմերը։
Արտավազդ Փելեշյանը 1974թ. հրատարակեց «Տարածական մոնտաժ» գիրքը, որը դասագիրք է դարձել բուհերի ուսանողների համար:
Միջազգային մամուլը և հանրաճանաչ գործիչները նրան համարել են մեր ժամանակների ամենատաղանդավոր կինոռեժիսորներից մեկը: Նրա տարածական մոնտաժը համարում են նոր խոսք կինոմոնտաժի տեսության մեջ Էյզենշտեյնից և Վերտովից հետո։
2006թ. երևանյան «Ոսկե ծիրան» կինոփառատոնում արժանացավ Փարաջանովի մրցանակին՝ համաշխարհային կինոյին բերած ավանդի համար։ Նույն թվականին նրան շնորհվեց Հայաստանի ժողովրդական արտիստի կոչում։ Երևանի (2000թ.) ու Վանաձորի պատվավոր քաղաքացի է (2006թ.):